Sco l’Uffizi da guaud e privels da la natira dal Grischun communitgescha sajan circa 35’000 edifizis pertutgads da privels da la natira. La valur totala da quests edifizis vegn stimada a circa 25 milliardas francs. Ils edifizis pertutgads pudessan esser periclitads d’auas (inundaziuns, bovas), sbuvadas, lavias sco er da process da crudada da crappa ni grippa.
Gia realisà pliras mesiras
Tenor ils responsabels dal chantun pratitgescha il chantun gia daditg la tgira persistenta dals guauds da protecziun e fa regularmain lavurs da mantegniment vi da las ovras da protecziun existentas.
Il nivel da la protecziun cunter privels da la natira è fitg aut en l’entria Svizra. Quai resulta dal rapport dal Cussegl federal ch’el ha deliberà, scriva il chantun. Dentant pretenda quest rapport federal ulteriuras mesiras. La gronda sfida vegnia ad esser da planisar las mesiras necessarias ed ils meds finanzials per garantir er en l'avegnir la protecziun cunter privels da natira, scriva il Cussegl federal. Anc da realisar sajan scolaziuns da cussegliaders locals da privels da la natira che averteschan avant lieu ed a d’uras ils stabs responsabels tar las vischnancas.
Observar svilups ad uras
Er il chantun Grischun ha en quest connex elavurà in manaschament integral dals ristgs per pudair constatar svilups da las ristgas. Quai tant tar ristgs da privels da la natira sco er ristgas tecnicas e ristgas socialas. Fin che las analisas èn avant maun per tur ils territoris d’abitadi ston uss anc vegnir fatg ulteriurs sforzs. La natira po adina puspè esser incalculabla uschia che l’occupaziun cun privels da la natira n’è mai finida, scriva l’Uffizi chantunal da guaud e privels da la natira.
RR novitads 12:00