Il schef da la giuria, Bernhard Russi ha ditg ch'ins veglia promover interpresas che prestian chaussas extraordinarias ed inspireschian autras regiuns en Svizra.
Sis interpresas han persvas perquai ch'ellas giogan ina gronda rolla en lur regiun. Saja quai sco patrun u sco partenari per mastergnanza e turissem.
Ils nominads:
- communicaziun.ch, Glion (GR)
- Tessanda, Santa Maria (GR)
- Gantrisch Goldkorn, Längenbühl (BE)
- Goût & Région, Couvet (NE)
- von Rickenbach Energy, Muotathal (SZ)
- Votre Cercle de Vie, Château d'Oex (VD)
La «manufactura» unescha tuttas disciplinas da la communicaziun sut in tetg. Tgi che spluntia vid las portas da communicaziun.ch a Glion chattia in conturn da lavur che giess er a prà cun ina citad gronda, scriva Prix Montagne. En las stanzas modernas lavurian chaus creativs, strategs e realisaturs maun en maun vid schliaziuns da communicaziun.
La Val Müstair selvadia en l'ost da la Svizra na dettia betg be albiert al Parc Naziunal Svizzer ed ina claustra renumada, scriva Prix Montagne. Exact uschè impurtant per la regiun saja la pli gronda tessaria da maun da la Svizra, che haja dumagnà il sprun en l'avegnir, cun sias textilias da qualitad e cun designs actuals.
Tgi che gudogna la fin finala il premi, dotà cun 40'000 francs, vegn enconuschent ils 10 da december. El vegn surdà dal minister d'economia Guy Parmelin.
Premi dal public vegn decidì online
Supplementarmain tar il Prix Montagne datti er in premi dal public cun la valita da 20'000 francs. Sin la pagina d'internet prixmontagne.ch pon ins ir a votar fin ils 19 da november per ses favurit.
