Dus terzs da la naiv ch’ins chatta sin las pistas a Lai è naiv artifiziala. Quai san ins grazia ad in sistem da GPS che sa chatta en las maschinas da pista. Quel mesira quants centimeters naiv che sa chattan sut la maschina, pia nua ch'i ha blera u pauca naiv. Nov n'è quel sistem betg. Nov è però ch'ins vul nizzegiar las datas rimnadas dal sistem da GPS en las maschinas da pista.
Nova cumbinaziun da datas
Il project Pro Snow cumbinescha las datas da GPS cun la previsiun da l'aura. Silsuenter duai in program pudair predir cura ch'i fa basegn d'installar ils chanuns da naiv e cura betg. La finamira è da pudair sbassar uschia ils custs d'energia. L'idea è simpla: Producir naiv pir cura ch'i fa basegn. Ils responsabels dal project quintan da spargnar enfin 30% dals custs che naiv artifiziala chaschuna.
Actual vegn il test manà tras a Lai sco er en ulteriuras regiuns en differents pajais en l'Europa. Finanzià vegn il project da la Uniun europeica.
RTR actualitad 17:00