Ina finamira che Cornelia Camichel-Bromeis aveva fixà avant in onn era dad emprender ad enconuscher las plaivs grischunas. Quai haja ella entant fatg, sco ella ha ditg envers RTR. Cun far las visitas haja ella constatà, che las plaivs grischunas n'hajan vairamain nagins problems, ch'i saja plitost la vita dal mintgadi che occupi. Temas damai sco la tschertga da commembers e commembras per las suprastanzas ni fusiuns da plaivs.
Autra optica sco dunna
Cornelia Camichel-Bromeis è l'emprima dunna sco decana da la Baselgia evangelic refurmada dal Grischun. Schebain ella saja perquai ida auter vid la lavur quest'onn na sappia ella betg dir. Ma ella haja sco dunna segir in'autra optica ch'ils umens. Uschia haja ella dapli encletga per exempel per la situaziun dals reverendas tudestgs. Ella sco dunna, che saja en tscherts gremis la suletta dunna tranter umens haja encletga per lur situaziun dad esser en la minoritad.
Respunder cun teologia sin ils gronds temas actuals
En l'avegnir vul Cornelia Camichel-Bromeis era s'occupar cun temas actuals, sco per exempel la crisa da fugitivs. Tenor ella saja da respunder cun teologia sin las dumondas ch'i sa dattan londerora.