Siglir tar il cuntegn

Header

audio
Christian Mathis vul indemnisaziun per ils custs da process
Or da Actualitad dals 05.10.2020.
laschar ir. Durada: 03:21 minutas.
cuntegn

Process chatscha speziala Christian Mathis e ses cuniniziants van puspè a Losanna

La regenza stoppia star botta per custs da process da 113’000 francs. Da quest avis èn ils iniziants da l’iniziativa cunter la chatscha speziala. Uss van els cun lur plant al Tribunal federal.

Els avessan pudì spargnar ils custs da process, sche la regenza grischuna avessia infurmà correct, argumenteschan ils iniziants cunter la chatscha speziala.

Cussegl grond avess decidì auter

Cusseglier guvernativ Mario Cavigelli haja tegnì enavos in parairi da l’uffizi federal d’ambient (BAFU) ch’è vegnì a la conclusiun che l’iniziativa saja valaivla. Sch’il Cussegl grond avessi savì da quest parairi, avessi el cartaivlamain betg declerà l'iniziativa sco nunvalaivla l'onn 2015. Quai declera Christian Mathis, in dals set iniziants da l’iniziativa cunter la chatscha speziala, envers RTR.

Gliez avess spargnà blers custs als iniziants. Els han numnadamain stuì cumbatter fin al Tribunal federal per la valaivladad da lur iniziativa. Il 2017 han els survegnì cumplainamain raschun dals derschaders da Losanna. Il suveran grischun ha lura dentant refusà l'iniziativa il matg 2019.

In giurist e cusseglier guvernativ sco Mario Cavigelli avess stuì savair ch'ins stoppia far enconuschent in tal parairi
Autur: Christian Mathisiniziant cunter la chatscha speziala

Il cumbat giuridic ha custà ils iniziants 113’000 francs per quints d’advocat. Cun in plant da responsabladad da stadi han ils iniziants pretendì a la dretgira administrativa grischuna ch’il chantun paja ad els quests custs. L’avust ha la dretgira administrativa refusà il plant.

Ils iniziants han uss tratg vinavant il cas al Tribunal federal – cun la speranza da survegnir ina segunda giada raschun a Losanna.

RTR novitads 10:00

Artitgels legids il pli savens

Scrollar a sanestra Scrollar a dretga