Siglir tar il cuntegn

Chantun Procura publica è uss vi dal cas Quadroni

Uss sa fatschenta era la Procura publica grischuna cun l'arrestaziun d'Adam Quadroni, l'um ch'ha procurà che las cunvegnas da pretschs en la branscha da construcziun èn vegnidas a la glisch. Quai ha instradà cusseglier guvernativ Christian Rathgeb.

Cusseglier guvernativ Christian Rathgeb.
Legenda: Cusseglier guvernativ Christian Rathgeb ha dà l'incumbensa a la Procura publica grischuna. RTR

Cusseglier guvernativ Christian Rathgeb haja purtà plant cunter nun-enconuschent, per laschar intercurir in'acziun da polizia dispitaivla cunter Quadroni. Quai scriva la «NZZ am Sonntag». Sclerì vegn sch'ils policists involvids han agì correct.

Gia enconuschent eri ch'il Departament da giustia lascha sclerir intern l'arrestaziun dispitaivla da Quadroni. Tant il schef da departament Christian Rathgeb sco era il schef da la polizia Walter Schlegel han ditg, ch’els stettian davos lur glieud.

L'acziun dispitaivla

Il zercladur 2017 aveva ina gruppa speziala da la polizia arrestà il whistleblower Adam Quadroni. Sia dunna ch’era en charplina cun Quadroni, aveva inditgà ch’el pudessi mazzar sasez ed auters. Suenter plirs dis en ina clinica psichiatrica avevan ils medis relaschà Quadroni, damai ch’els avevan constatà che l’um na saja betg privlus.

RR novitads 06:00