Siglir tar il cuntegn

Header

cuntegn

Chantun Professura rumantscha: Cussegl federal na po betg far pajar l'ETH

Il Cussegl federal na po betg scumandar a la Scola politecnica da Turitg da stritgar la contribuziun annuala per la professura rumantscha a Turitg. El è dentant pront d'intermediar tranter ils pertutgads per chattar ina soluziun cuntentaivla per mantegnair e promover vinavant il rumantsch.

Avant in'emna aveva la Scola politecnica federala (ETH) da Turitg decidì da betg pli sustegnair la professura rumantscha a l'Universitad da Turitg. Quai per motivs da spargn. Senza ils 100'000 francs na pudess l'Universitad da Turitg dentant betg mantegnair pli la professura.

Duas differentas dumondas èn vegnidas inoltradas, sin las qualas il Cussegl federal ha respundì identicamain, ina giada per rumantsch, ina giada per tudestg:

Dumonda da Silva Semadeni:

  • 1. Wie beurteilt der Bundesrat diese Kürzung?
  • 2. Wie will er ein qualifiziertes Romanischstudium sichern und seine finanzielle Mitverantwortung in Zukunft wahrnehmen?

Dumonda da Martin Candinas:

  • Co va ei vinavon cun la professura romontscha all'universitad da Turitg?

Purschida è centrala per cultura rumantscha

Ina purschida universitara da linguistica e da scienza litterara rumantscha saja, tenor il Cussegl federal, centrala per il mantegniment e per la promoziun da lingua e cultura rumantscha. Actualmain instrueschan las universitads da Friburg e da Turitg, il rumantsch, en in rom pli restrenschì era l'Universitad da Genevra. Quai sin nivel da bachelor e da master.

audio
Saira: Semadeni e Candinas davart rumantsch a l'ETH
ord Actualitad dals 15.09.2016.
laschar ir. Durada: 1 minuta 52 Secundas.

Cussegl federal è pront d'intermediar

Il Cussegl federal respecta la decisiun da l'ETH da vulair sistir la contribuziun, damai che questa decisiun saja legala en il rom da l'autonomia.

I saja la cumpetenza dal chantun da concepir la purschida da studi da las universitads chantunalas sco l'Universitad da Turitg.

En vista a sia incumbensa constituziunala da promover las linguas naziunalas saja il Cussegl federal pront d'intermediar tranter ils chantuns e las universitads pertutgadas. La finamira saja, ch'ina purschida universitara adequata possia vegnir mantegnida en l'avegnir. La Confederaziun sustegna, sin fundament da la lescha da linguas, era il Grischun tar il mantegniment e la promoziun da la lingua e cultura rumantscha.

RR novitads 18:00

Artitgels legids il pli savens