Siglir tar il cuntegn

Header

In purtret cun ils logos da las partidas politicas en il Grischun.
Legenda: RTR
cuntegn

Proporz, maiorz, ina maschaida Co eleger il Cussegl grond? – opiniuns da las partidas

Las 120 deputadas e deputads dal Grischun duain vegnir elegids cun in nov sistem d’eleger – numnadamain il proporz dubel. Quai è il sistem favurisà, da las trais propostas da la regenza. Fin oz, ils 30 da zercladur han era las partidas gì temp da prender posiziun, tge sistem ch'è lur favurit.

En general pon ins dir che las partidas dretg e sanester, pia la PPS e la PS, èn per la proposta da la regenza – il proporz dubel. Las partidas da mez èn per il sistem da maiorz maschadà. Tar il sistem dal proporz vegn elegì tenor partidas e tar il sistem dal maiorz tenor persunas.

Proporz dubel

Il proporz dubel saja la varianta la pli gista, di il president da la partida populara, Roman Hug. Uschia valian tut las vuschs dals votants tuttina bler, agiunta el, ed ils candidats hajan uschia pli sumegliantas premissas per vegnir elegids.

Maiorz maschadà

Per il president da la Partida liberaldemocratica, Bruno Claus, è il sistem maschadà il favurit. En 37 circuls elegian ins vinavant en furma da maiorz, ma en ils circuls Cuira e Tschintg vitgs proporz. Gian Michael da la PBD agiunta che quest sistem saja era pli chapibel per la populaziun, ed els èn da l'avis ch'ils Grischuns elegian pli gugent persunas che partidas.

La PCD, lezza na vuleva anc betg tradir tge sistem ch'els elegian. Ma Stefan Engler di ch'els hajan las medemas pretensiuns vi dal nov sistem d'eleger sco tschellas partidas da mez.

RTR actualitad 07:00