Siglir tar il cuntegn

Header

cuntegn

Provediment da sanadad Sfidas spezialas en regiuns cun blera glieud veglia

En regiuns nua ch'i dat adina dapli glieud veglia, stattan ins avant sfidas spezialas pertutgant il provediment da sanadad. Quai stat scrit en il rapport ch'il chantun publitgescha mintg'onn davart las cifras ed il svilup da sanadad en il Grischun.

Glieud veglia dovra pli savens medis, terapias ed ospitals. I dovra er dapli chasas d'attempads en regiuns cun dapli glieud veglia. Tut quai na fiss nagin problem, uscheditg che la cumpart da glieud veglia crescha circa tuttina fitg sco la cumpart da glieud giuvna.

Sfida per inqual regiun

En il Grischun n'è quai dentant en differentas regiuns betg pli il cas, constatescha il rapport da sanadad ch'è cumparì il glindesdi. En tschertas regiuns crescha la cumpart da glieud giuvna pli pauc che quella da glieud veglia, u ch'ella va perfin enavos. Quest svilup sa mussa cunzunt en la Val Müstair, l'Engiadina Bassa, la Bregaglia ed il Surmeir.

video
Novitads
Or da Telesguard dals 09.11.2020.
laschar ir

Da mantegnair en questas regiuns il provediment da sanadad saja ina sfida speziala, scriva il chantun. Ins quintia che la dumonda suenter prestaziuns medicinalas, creschia en quellas regiuns pli fitg, malgrà la digren da la populaziun.

Rapport be pli online

Il rapport davart il stan actual dal provediment da sanadad dal Grischun cumpara da nov online. Tenor la chanzlia chantunala pussibiliteschia quai da publitgar quel pli svelt e da cumplettar permanentamain las datas. En furma stampada cumpara il rapport davart il provediment da sanadad be pli quest onn.

Il rapport duai gidar tut las persunas involvidas en fatgs da sanadad ad ademplir lur incumbensa e consequentamain garantir a lunga vista il provediment decentral da la sanadad en il chantun.

RTR novitads 09.00

Artitgels legids il pli savens

Scrollar a sanestra Scrollar a dretga