La Cassa da pensiun dal Grischun serra l'onn 2020 cun ina rendita totala da 6,4% sin la facultad da 3,3 milliardas francs. Sco quai che la cassa da pensiun communitgescha, haja il grad da garanzia cuntanschì 109,8%, quai èn sis puncts procentuals dapli ch'il 2019. Vinavant scriva la cassa ch'ella haja rinforzà las stentas en favur da la persistenza. Ella haja transferì sias investiziuns en aczias en novas furmas d'investiziun pli persistentas.
La Cassa da pensiun dal Grischun noda era custs administrativs fitg bass en cumparegliaziun svizra. Cun 122 francs per persuna assicurada èn quels lunsch sut la media svizra da 253 francs.
En il Grischun èn assicurads bunamain 12'500 persunas tar la Cassa da pensiun dal Grischun. Quai èn en spezial emploiadas ed emploiads dal chantun, il persunal da var dus terzs da las vischnancas grischunas sco er autras corporaziuns ch'adempleschan surtut incumbensas publicas.
