Il favrer 2018 aveva il Cussegl grond concludì che las sessiuns duajan vegnir transmessas live en l'internet. La conferenza da las presidentas e dals presidents ha procurà silsuenter ch'i vegnia installà l'infrastructura tecnica necessaria. Quella ha pudì vegnir examinada e controllada durant las sessiuns da stad. Ins aveva atgnamain previs il livestream per la sessiun da l'avust. Pervi da problems tecnics han ins dentant stuì spustar l'introducziun ed organisar in server supplementar.
Durant la proxima sessiun d'october vegnan ussa transmessas las debattas dal Cussegl grond per l'emprima giada live. Il stream po vegnir guardà tant sin il smartphone sco er sin il tablet u sin il computer. La finamira dal livestream or da la sala dal Cussegl grond è da cuntanscher in public pli vast che po persequitar las debattas dal parlament grischun via la pagina d'internet dal chantun.
RR novitads 10:00
