Siglir tar il cuntegn

Header

video
Bogns, pendicularas e scolas medias dastgan puspè avrir
Or da Telesguard dals 05.06.2020.
laschar ir. Durada: 3 minutas 38 Secundas.
cuntegn

Proximas schluccadas Suenter 12 emnas sien da Rosaspina

A partir da questa sonda avran kinos, campadis, pendicularas, discos ed autras purschidas dal temp liber puspè lur portas. Tuts cun concepts da segirtad.

Grafica cun survista da schluccadas 06-06
Legenda: Quai vala a partir dals 06-06-2020. RTR

Ir a kino...

Il plaschair è grond tar las interpresas che dastgan cun la terza schluccada avrir la portas. Uschia è Rita Kalberer da Kino Cuira surlevgiada da puspè dastgar beneventar fans da film en las salas da kino. Cudeschar bigliets duess mintgin online, uschiglio chanaliseschan ils responsabels la glieud en las localitads e laschan plaz tranter las gruppas che van a kino.

Ir en sortida ...

Amaturs da la notg vegnan er puspè sin lur custs. Locals da sortida cun maximalmain 300 persunas e restricziun da distanza pon puspè avrir. Inqual local resta dentant tar sia purschida da gastronomia. Auters fan be concerts e purschidas pitschnas cun seser. Uschia per exempel il Cinema sil plaz a Glion. Els cumenzian cun preschentaziuns da film e concerts da seser. Concerts da star en pe fetschian il mument nagin senn, cunquai ch'il local saja pulit pitschen, ha declarà Martina Cadonau, responsabla per il program dal Cinema sil plaz.

Far bogn...

Er bogns averts e da wellness avran puspè. Il bogn Scuol ha fatg diversas preparativas per ademplir las prescripziuns. Uschia datti tranter auter en ils bogns e las gardarobas limitas da persunas. Mario Duschèn, manader dals implants da sport Scuol na quinta betg, ch'il bogn vegnia al cumenzament al cunfin da las capacitads. Ma sche las restricziuns valian enfin viaden en la stad, pudessi esser che las capacitads actualas na tanschian betg pli.

audio
Pendicularas e bogns pon puspè avrir
ord Actualitad dals 06.06.2020.
laschar ir. Durada: 3 minutas 28 Secundas.

Ir cun pendicularas...

Er Philipp Holenstein, CEO da las pendicularas d'Arosa è led ch'i va puspè liber. Els sa basan sin il concept da segirtad dal traffic public. Concret vesa quai or uschia ch'els laschian ir siadora las gruppas singulas en las gondlas pitschnas. Per ch'i na dettia betg temp da spetga hajan els augmentà la capacitad da las gondlas. En gondlas grondas stoppian ins star sin distanza, sche gliez giaja betg u spetgar la proxima gondla, ubain duvrar ina mascra sco en il traffic public. Holenstein appellescha dentant al saun giudizi da mintgin.

RTR Telesguard 17:40

Artitgels legids il pli savens