La suprastanza da la PS Grischun è s'exprimida unanimamain cunter la sanaziun dal tunnel da via dal Gottard, cunter l'iniziativa per il repatriament effectiv e cunter l'iniziativa per la lètg e la famiglia.
En detagl argumentescha la partida sias posiziuns sco suonda:
NA: Sanaziun dal tunnel da via dal Gottard
La PS refusa l’iniziativa, perquai ch’ella attiria dapli camiuns da transit. Plinavant na resguardia l’iniziativa betg la politica da dischlocaziun, davart la quala il pievel ha decis. Er fetschia il project gronds donns a l’ambient alpin e torpedeschia la NEAT.
NA: Iniziativa per il repatriament effectiv
La partida refusa quest’iniziativa, perquai ch’ella mettia en dumonda principis centrals da las convenziuns per ils dretgs umans da l’UE ed era la Constituziun federala. Ultra da quai attatgia ella ina giada dapli ils contracts bilaterals cun l’UE. Il 2014 sajan passa 10’000 persunas vegnidas extradidas da la Svizra, malgrà ch’il text original da votaziun numnava ina summa da 1’500.
NA: Iniziativa per la lètg e la famiglia
L’iniziativa è tenor la PS in «plan premodern»: ella sutmineschia tut las fadias per la «lètg per tuts». Il project vul scriver en la Constituziun federala, che la lètg è ina communitad tranter um e dunna.
GEA: Iniziativa «Nagina speculaziun cun nutriment»
Gea di la PS a quest’iniziativa. La speculaziun cun nutriment saja ina «furma irresponsabla da far profit». Ils speculants chatschian ad aut ils pretschs dal nutriment e sajan uschia conculpaivels per la fom sin il mund. L’iniziativa termineschia quest agir da firmas svizras. La Svizra stoppia percepir sia responsabladad e franar la speculaziun cun nutriment.
Davart quest projects vegn votà ils 28 da favrer 2016.
RR novitads 16:00