I rendia da prender in fegl e far in plan, tge dis ch’ins vul far sport. Quai di Katharina Albertin, la presidenta dals psicologs da sport svizzers. Bun saja era da scriver ils termins en l’agenda da famiglia. Quai obligheschia ed ils commembers da la famiglia dumondian lura suenter, sch’ins saja atgnamain stà a far sport – ina tscherta controlla sociala pia.
Far sport cun collegas
Pussaivel saja er da far giu cun ina amia u in collega dad ir a currer u ir a spass. Mintgin enconuschia gea sias atgnas stgisas, sco per exempel da betg pudair ir a trenar, sch’igl è gia stgir. Lura stoppian ins halt ir la damaun u durant il cler di.
Impurtant saja er da regularmain far sport:
Pli gugent mo ina giada l’emna che insumma mai
Tge gener da sport n’emportia betg. Il meglier insatge ch’ins haja tschaffen. La perscrutaziun mussia che mintga uman haja sias preferenzas: Ils ins gioghian gugent cun la balla, auters veglian sa mover en il liber. Talas preferenzas sajan decisivas per avair plaschair dal sport.
Effect neurobiologic
Moviment procura per meglra luna – in effect neurobiologic. Savens sentian ins quai gia durant il sport, di la psicologa da sport. Ed ord vista psicologica: Ins saja losch d’avair dumagnà sasez, losch sin la prestaziun. Far sport dettia segirezza.
Durant currer u sa mover sa zavrian ils patratgs nunimpurtants dals patratgs impurtants – sco tar in culin, di Katharina Albertin. Uschia gudognian ins survista, tge ch’occupeschia ins e tge betg.
Cun corona vivian nus en in temp plain imprevisibladads e malguessadads. Quai n’haja l’uman betg gugent. Il sport porschia qua in ulteriur effect positiv – in sentiment da controlla. Tgi che fetschia sport haja la controlla sur da ses far e demanar.
Sport è calculabel e quai fa bain en temps da corona
Sch'il sport surpiglia la reschia
Da l'auter maun è Katharina Albertin adina puspè confruntada cun l'auter extrem: memia bler sport. Moviment e controlla da l'agen corp po er daventar problematic e far donns da sanadad tar persunas che na fan betg sport d'elita. Lura discurran ins d'ina dependenza da sport.
Sin l'emprima egliada haja la dependenza da sport savens motivs sco gronda passiun per moviment ubain la motivaziun da prender giu u definar il corp. Pli profund sajan savens anc autras problematicas, declera la psicologa da sport. En ina terapia giaja quai perquai per l'ina da reducir e remplazzar il sport per l'autra da lavurar si las autras tematicas che mainan ad ina dependenza da sport.