Siglir tar il cuntegn

Header

Video
Il rapport intermediar da la PUK crititgescha la polizia
Or da Telesguard dals 26.11.2019.
laschar ir
cuntegn

PUK preschenta rapport Ferma critica envers la Polizia chantunala

Il rapport parzial da la cumissiun d'inquisiziun parlamentara (PUK) mussa sbagls e mancanzas en la lavur da la Polizia chantunala. Uschia metta ella en dumonda, sche l'arrestaziun dal whistleblower Adam Quadroni saja stada necessaria e constatescha documentaziuns manglusas.

La cumissiun d'inquisiziun parlamentara (PUK) intercurescha ils embrugls en connex cun il cartel da construcziun en l'Engiadina. En in emprim rapport parzial ha la PUK uss preschentà ils resultats en connex cun las acziuns da polizia cunter il whistleblower Adam Quadroni, ch'aveva da lez temp mess en moviment las inquisiziuns da la WEKO. Quella aveva chastià diversas firmas da l'Engiadina, perquai ch'ellas avevan durant onns fatg giu pretschs ina cun l'autra.

PUK cartel da construcziun

Personen-Box aufklappenPersonen-Box zuklappen

Il zercladur 2018 ha il Cussegl grond decidì d'installar ina cumissiun d'inquisiziun parlamentara (PUK). Quella ha las suandantas incumbensas:

a) Examinar e sclerir las responsabladads e la gestiun da commembers da la regenza, dals departaments ed uffizis – quai cunzunt en il Departament da construcziun, traffic e selvicultura en connex cun il cartel da construcziun en l’Engiadina.

b) Examinar il controlling e la surveglianza interna sin nivel departament ed unitad d’administraziun – vul dir examinar co ch'igl è vegnì agì tar indizis en connex cun il cartel da construcziun.

c) Inquisiziun da las acziuns da polizia e dal cumportament d’ulteriuras autoritads envers Adam Quadroni.

d) Examinar co che las autoritads, ch’èn stadas involvidas en las acziuns da la polizia, èn vegnidas survegliadas.

En il rapport parzial preschentà ils 26-11-2019 vegnan tractadas las incumbensas c) e d).

En l'emprim rapport parzial, che la PUK ha publitgà, ha ella prendì sut la marella trais intervenziuns da polizia en connex cun Adam Quadroni. Medemamain vegnan las rollas d'autras instanzas involvidas intercuridas. Il rapport vegn tranter auter als suandants resultats:

  • La PUK constatescha en divers lieus mancanzas e sbagls tar la Polizia chantunala. Uschia hajan la polizia sco er autras instanzas involvidas tralaschà lur obligaziun da documentaziuns.
  • En dumonda metta la PUK er il giudicat da la polizia che Adam Quadroni saja ina persuna fitg privlusa. Quest giudicat derivia per gronda part d'ina suletta funtauna, numnadamain dal schef dal post da polizia dal lieu. Quest giudicat è lura er stà la basa per l'arrestaziun.
  • L'arrestaziun d'Adam Quadroni (zercladur 2017) entras ina unitad da grenadiers saja en il rom da la lescha. Quai sin fundament da las infurmaziuns ch'ins aveva da lez temp. En dumonda metta la PUK, sche l'arrestaziun saja stada necessaria.
  • Per liar ils mauns ad Adam Quadroni tar ses transport en la clinica psichiatrica (suenter l'arrestaziun) na devi nagina basa legala.
  • Ils superiurs dal schef dal post da polizia al lieu n'hajan betg verifitgà u controllà, sche ses giudicament saja propi correct.
  • Er il cumandant da la Polizia chantunala, Walter Schlegel, vegn crititgà. Tenor la PUK n'haja el betg mo l'obligaziun da manar e cumandar, mabain er da controllar che las incumbensas vegnian realisadas, e quai a moda correcta. La cumissiun d'inquisiziun na lascha betg valair l'argumentaziun da Walter Schlegel ch'el na possia betg controllar mintga singul cas.
  • Indizis che las autoritads chantunalas sajan vegnidas instrumentalisadas da persunas ch'èn supponidas d'esser involvidas en il cartel da construcziun, n'ha la PUK betg chattà.

La PUK ha er fatg ina retscha da recumandaziuns co meglierar tscherts proceders. Tranter auter cusseglia ella il suandant:

  • Documentaziun en l'administraziun: la PUK suttastritga l'impurtanza da la documentaziun da las autoritads.
  • Management da privel chantunal: Tenor la PUK dettia potenzial tar il management da privel, pia sch'i va per far in giudicat, schebain ina persuna è privlusa u betg. Als collavuraturs da la Polizia chantunala manchia la savida per taxar persunas sco privlusas. Per far tals giudicats dovria quai persunas dal fatg (da la psicologia, psichiatria).
  • Persunas cun funcziun da manar stoppian, tenor la PUK, surpigliar dapli responsabladad. Perquai cusseglia ella dar dapli paisa a la tematica «manar».

Ils proxims pass

L’analisa dals embrugls enturn il cartel da construcziun e l’acziun da la polizia en connex cun il whistleblower Adam Quadroni cuntinuescha:

  • Glindesdi ils 2 da december discutescha il Cussegl grond il rapport da la PUK
  • In segund rapport davart il cartel da construcziun è anc en lavur tar la PUK
  • In’analisa interna davart la lavur da la polizia che la regenza ha laschà far l’anteriur procuratur public Andreas Brunner è finida
  • Tar il procuratur public extraordinari Urs Sutter èn pendentas pliras inquisiziuns, tranter auter en connex cun la lavur da la polizia chantunala (cunter in policist pervia da maldiever d’uffizi, cunter Adam Quadroni ed in’ulteriura persuna pervia da violenza e smanatschas vers la polizia e cunter ina persuna d’in uffizi pervia da maldiever d’uffizi)

Tge è ina PUK?

Personen-Box aufklappenPersonen-Box zuklappen

Il Cussegl grond surveglia tranter auter l’administraziun chantunala. Sch’i dat cas u eveniments da gronda muntada che ston vegnir sclerids, lura po vegnir installada ina cumissiun d’inquisiziun parlamentara (PUK). La PUK è l’instrument d’examinaziun il pli ferm dal parlament ed ha in dretg d’infurmaziun vast. Uschia po ella tranter auter interrogar persunas ord l’administraziun u er pretender invista en actas d’uffizis. Las autoritads na pon betg sa referir sin lur secret d’uffizi. Il Cussegl grond ha decidì il zercladur 2018 unanimamain d’installar ina tala PUK per examinar il cartel da construcziun. En l’istorgia dal chantun Grischun è quai l’emprima PUK.

Ils commembers èn: Michael Pfäffli (PLD, San Murezzan), president, Beatrice Baselgia-Brunner (PS, Domat), vicepresidenta, Walter Grass (PBD, Urmein), Livio Zanetti (PCD, Landquart), Jan Koch (PPS, Igis)

Per guardar – l'entira conferenza da medias

Video
Conferenza da medias PUK cartel
Or da RTR Social dals 26.11.2019.
laschar ir

RR novitads 10:00+