Siglir tar il cuntegn

Header

La sala dal cussegl grond emplenida da deputadas e deputads. Davantvart la regenza
Legenda: Reacziuns sin il program da la regenza 2017-2020 Las fracziuns dal Cussegl grond han inqual punct da reclamar. Maletg d'archiv. RTR
cuntegn

Chantun Puncts dispitaivels dal program da la regenza

Ina da las tractandas da la sessiun dal favrer en il Cussegl Grond è il program da la regenza per ils onns 2017 enfin 2020. Ina discussiun è gia previsibla, perquai che betg tut ils parlamentaris èn d'accord cun la strategia dal chantun.

En general saja il program da la regenza acceptabel, dentant mintga fracziun dal cussegl grond ha chattà en il program in u l'auter punct ch'è tenor la partida distipaivel.

Fracziuns chattan puncts dispitaivels

Per exempel quai che pertutga las finanzas. Ils onns grass per il chantun èn passads, davent dal 2018 quinta il chantun cun deficits da 80 enfin 100 milliuns francs. Perquai vul la partida liberaldemocrata che la regenza mettia en il program ad uras ina strategia da spargnar, betg pir cur ch'il chantun è gia en las cifras cotschnas.

I va per ils daners…

Er la PBD vul, ch'il chantun pensa ad uras vi da la cassa. El na dastgia betg simplamain dar or daners, senza puspè cumpensar quai insaco. La PS tema, ch'ils daners na tanschian betg per realisar las finamiras dal program da la regenza.

… la scolaziun…

In auter punct dispitaivel è la scolaziun. La PBD vul ina strategia cunzunt per scolas autas. Il program da la regenza prevesa ina revisiun totala da la lescha da scolas medias. La fracziun da la PCD è da l'avis, ch'i na dovria betg ina revisiun totala da la lescha da scolas medias. La lescha saja gist pir vegnida revidida.

…e l'energia

In terz punct dispitaivel pertutga la politica d'energia. La partida populara crititgescha, ch'i na dettia insumma nagina strategia en il programm, co ch'il chantun vul per exempel agir cun la Repower ubain co ch'il chantun vul sa posiziunar.
La sessiun entschaiva proxim glindesdi, lura pon las partidas far valair lur posiziun.

Dapli da Grischunavrir la Landingpage

Nach links scrollen Nach rechts scrollen