La punt da Sunniberg ha survegnì premis avant ch'ella è vegnida averta per il traffic. Ella è dentant tuttina mo ina da bundant 100 punts, che Christian Menn ha construì en sia carriera.
L'inschigner, ch'ha gì in biro a Cuira, ha fabritgà tranter auter la punt da Reichenau, las punts sin il tschancun dal San Bernardino tranter Tusaun ed il Mesauc u la Ganterbrücke en il Valais.
Punts en il Stadis Unids
Era sur il cunfin ora ha Christian Menn pudì construir punts, per exempel en ils Stadis Unids. El ha construì ina punt sur il Niagara River a Buffalo, ina sur il Colorado River tar il Hoover Dam in vischinanza da Las Vegas ed ina sur il Charles River a Boston. Quella è cun 56 meters la pli largia e maina ils autos sur diesch vials sur il flum vi.
Christian Menn n'ha tuttina mai gì il sentiment d'avair construì la punt perfetga. El saja adina stà critic cun sai e sias ovras ed haja suenter mintga construcziun empruvà dad emprender insatge.
RR actualitad 08:00