Siglir tar il cuntegn

Header

Navigaziun

Legenda: Guardar il video Fieus dal 1. d’avust: Tge po vegnir brischà?. Durada 02:21 minutas.
Or da sil punct dals 31.07.2019.
cuntegn

Chantun Puspè in 1. d'avust cun rachetas e fieus

Ils fieus per il di da la festa naziunala svizra han tradiziun. Tschertas vischnancas organiseschan in fieu artifizial e sin ils pizs e culms ardan fieus dad 1. d'avust. Cuntrari a l'onn passà èn quels questa giada puspè lubids – almain en la gronda part dal chantun.

Pervia da la setgira da la stad passada ed il privel d'incendis da guaud avevan bleras vischnancas scumandà da far fieus artifizials. Quest onn n'è la situaziun betg uschè precara, malgrà las periodas da chalira dals ultims mais. Cunquai ch'i ha pluvì la fin d'emna è il privel per part sa reducì da considerabel sin moderà.

La situaziun da privel per ils proxims dis:

Carta actuala davart il privel d'incendis da guaud en il Grischun.
Legenda: GRAFICA RTR

Co èsi da sa depurtar tar ...

  • ... in privel da fieu moderà: Betg bittar giun plaun cigarettas e zulprins. Adina observar fieus ed immediat stizzar sch'i dat sbrinzlas.
  • ... in privel da fieu considerabel: Be far fieus da grillada en fuainas. Adina observar fieus ed immediat stizzar sch'i dat sbrinzlas. Suandar las instrucziuns da la vischnanca.

Tgi lubescha – tgi scumonda

Independent dal privel per incendis da guaud han tschertas vischnancas però decis da scumandar ils fieus artifizials. A Breil ed ad Arosa per exempel na datti nagins fieus artifizials pli en l'avegnir; tranter auter er per motivs da l'ambient.

Quai è fatg ...

  • las Svizras ed ils Svizzers cumpran mintg'onn passa 1'800 tonnas fieus artifizials
  • cun brischar quels vegni producì 320 tonnas pulvra fina che tartogna l'aria. Quai èn 2% da las emissiuns da pulvra fina annuala en Svizra
  • cumpareglià cun ils onns 90 è la vendita da fieus artifizials entant creschida per prest il traidubel

Scumonds da far fieus artifizials

En autras vischnancas valan scumonds parzials. La vischnanca da Mustér per exempel ha decis da desister en l'avegnir d'organisar fieus artifizials e quai per tut las festivitads. Las raschuns sajan dasper ils aspects da l'ambient er reacziuns per part negativas da la populaziun.

Jau sper cun in tschert effect d'imitaziun tar ils convischins.
Autur: Robert Cajacobpresident communal, Mustér

RR actualitad 07:00