Tut las classas hajan oz in scolast, ha Sandra Locher Benguerel declerà envers il schurnal regiunal dad SRF. Nua che quai na saja betg pussaivel, vegnia ina substituziun a surpigliar l'instrucziun. Ma quai sajan paucs cas. Singuls scolasts e scolastas temian da s'infectar cun il coronavirus durant lavurar. Qua sa tractia oravant tut da persunas en la gruppa da risico.
Scol'auta da pedagogia porscha maun
Gist cas cun persunas en gruppas da risico stoppian ins prender serius, di il manader dals inspecturs, Andrea Caviezel. Las scolas sajan patruns ed hajan uschia l'obligaziun da proteger la sanadad dals scolasts. «Nus giain da quai anora che be quels scolasts ch'appartegnan a gruppas da risico e che han consultà lur medi na pon betg instruir». Questas scolastas u scolasts survegnan autras incumbensas, uschia Caviezel vinavant.
En vista a las absenzas da persunas d'instrucziun porscha la Scol'auta da pedagogia dal Grischun maun. Radund indesch students u studentas ch'èn en l'ultim semester pon far substituziuns en singulas scolas. Vinavant pon persunas d'instrucziun era surpigliar d'instruir roms ch'els n'instrueschan normalmain betg. Quai senza stuair dumandar per ina lubientscha.