El saja vegnì cloccà e vegnì stratg vi da chavels e vestgadira or da l'auto – uschia raquintia l’anteriur interprendider da Ramosch e whistleblower Adam Quadroni a la «Rundschau» dals 15 da zercladur 2017, nua ch'ina unitad speziala da la polizia haja arrestà el.
Suenter saja el vegnì transportà en chanvettas e cun fascha d'egls sin il post da polizia, interrogà, examinà blut dad in medi uffizial. La polizia haja survegnì ina denunzia pervi da violenza en famiglia e pussibla periclitaziun dad auters e sasez. Actas da la polizia n'haja el mai vesì, raquinta Quadroni tenor SRF.
Acziun da polizia contestabla
Per l'expert da dretg da polizia è quest agir pli che dubitabel. Dr. Markus H.F. Mohler è da l'avis, ch'ins avessa stuì analisar l'emprim, sche Adam Quadroni saja propi privlus. Perquai sa dumondia el, pertge ch'ins n'haja betg organisà l'agir cun dus u trais policists, ch'avessian l'emprim sclerì la situaziun, rapporta l’emissiun «Rundschau».
Cun l'arrestaziun na saja quai betg stà finì – Adam Quadroni è vegnì transportà ed internà en la clinica psichiatrica, i seguan cuntraversas cun l'autoritad per la protecziun da l'uffant e da creschids. Avant la camera da la Rundschau ha Quadroni repetì elements da l'acziun sco quai ch'els eran gia vegnids revelads dal magazin online Republik.
Atgisa 1 – cunter ils responsabels da la polizia chantunala
Uss ha Adam Quadroni purtà plant. Tenor la Rundschau pretendia el, che las investigaziuns vegnian prendidas per mauns dad ina procura publica betg chantunala. Er questa pretaisa saja chapibla, di l'expert Mohler,
Atgisa 2 – cunter il cusseglier guvernativ Jon Domenic Parolini
La segund'atgisa – er ella saja vegnida inoltrada la mesemna, scriva SRF – sa drizzia cunter l'anteriur president comunal da Scuol ed actual cusseglier guvernativ, cunter Jon Domenic Parolini.
A Parolini rinfatscha Quadroni ch’el haja s'exprimì en l’intervista en l’emissiun Cuntrasts da dumengia passada da maniera ingiuriusa e ch’el haja cuntrafatg al secret d’uffizi.
En l’emissiun «Cuntrasts» aveva Parolini ditg, ch’els hajan gì anc auters problems e discurs cun la persuna (cun Adam Quadroni, precisescha SRF) e ch'els hajan er gì grondas discussiuns davart la credibilitad da questa persuna.
Adam Quadroni aveva contactà il 2009 il president communal da Scuol, quella giada Jon Domenic Parolini, e mussà ad el documents, che confermian che set interpresas da construcziun engiadinaisas hajan fatg cunvegnas da pretschs.
En il fratemp aveva investigà la cumissiun da concurrenza CumCo e revelà il pli grond cas da cartel en Svizra insumma. In emprima part da sias investigaziuns ha la CumCo gia publitgà e sancziunà cun chastis da 7,5 milliuns francs – in'ulteriura part pertutgant lavurs vi da las vias en Grischun è annunziada per questa stad.
Adam Quadroni haja pers en il decurs dals onns tut: La firma ha fatg falliment il 2013, la dunna ed ils uffants na vivian betg pli tar el. Tuttina, uschia Quadroni en la Rundschau, agiss el anc ina giada tuttina.
Sustegn da tut las varts – er da Giusep Nay
Alarmads dals raquints e da la situaziun dal whistleblower sa chatta glieud da tut la Svizra per rimnar daners per Adam Quadroni. La finamira era da rimnar 100'000 francs via ina plattafurma en la rait è reussida. Aifer sis dis han ins gia rimnà dapli che 100'000 francs. L'acziun cuzzà anc fin l'entschatta da zercladur.
Tranter questa glieud è er l'anteriur derschader dal tribunal federal Giusep Nay. Ina reparaziun cumplaina per Quadroni na saja betg pussaivla, di Nay en la Rundschau. La varianta minimala saja dentant da chapir, ch'i saja vegnì fatg tort ad Adam Quadroni e ch'i vegnia deplorà quai che saja succedì ad el.
RR novitads 20:00