Siglir tar il cuntegn

Header

Navigaziun

Legenda: Tadlar il audio Qualitad e quantitad. Durada 02:49 minutas.
Or da Actualitad dals 26.04.2019.
cuntegn

Qualitad e quantitad Chastè d'aua – malgrà stad da sitgira

Las navadas da l'enviern han puspè pudì curreger l'autezza da l'aua sutterrana, ch'era suenter la stad en insaquantas regiuns pli bassa. Tant puncto qualitad sco era puncto provediment d'aua sa chatta il Grischun en ina situaziun lucrativa.

Quai che pertutga aua en general ha il Grischun in privilegi. Cunquai che las funtaunas sa chattan tuttas en il chantun, na datti per exempel nagin privel da contaminaziuns entras autras persunas. Tut las contaminaziuns pon ins influenzar e meglierar al lieu. En general pon ins dir che la qualitad da l'aua da baiver è fitg buna - saja quai tar l'aua che vegn retratga sutterran u da funtaunas.

Medemamain constat il provediment d'aua en il chantun, malgrà la stad da sitgira da l'onn passà. Pervia da la chalira e la pauca plievgia è il nivel d'aua sutterrana bain sa sbassà - l'enviern cun massa naiv ha dentant pudì equilibrar per part la situaziun:

Sch'i dat puspè tranteren onns normals pon ils reservuars d'aua sutterrana puspè s'emplenir.
Autur: Remo Fehrmanader da l'uffizi chantunal da natira ed ambient

A curta vista confortabel, dentant...

Ina stad da sitgira po il Grischun pia surmuntar senza pli gronds problems. Sch'i vegn dentant cun la midada dal clima onn tar onn a dar stads cun uschè pauca plievgia, vegn era il chastè d'aua grischun a stuair prender mesiras. Questas adattaziuns savessan vegnir fatgas en il futur:

  • insaquantas culturas agriculas dovran forsa ina sauaziun permanenta
  • adattaziuns tar il provediment d'aua
  • las differentas zonas dal provediment d'aua stuessan forsa sa colliar

Glatschers sco assicuranza

Il mument profiteschan pliras regiuns era anc fitg dals glatschers, cunzunt l'Engiadina: La stad portan ils glatschers entras la bunatscha (luada da la naiv) numnadamain ina massa aua en flums e lais. Con ditg ch'i vegn dentant anc a dar ils glatschers è betg segir: Mintg'onn perdan els volumen pervi da la midada dal clima.

Nua ch'ins ha ina alimentaziun substanziala da las auas da surfatscha tras glatschers, vegn la situaziun a sa midar drastic cura ch'ils glatschers èn dal tuttafatg davent.
Autur: Remo Fehrmanader da l'uffizi chantunal da natira ed ambient

RR actualitad 07.00