Quant traffic cumporta il San Bernardino?

Di il pievel svizzer na al segund tunnel dal Gottard, lura dessi dapli traffic sur il San Bernardino. Quai pretenda tant l'ASTRA, l' Uffizi federal per vias, sco era l'Uffizi da vias dal chantun Grischun. Guardai las simulaziuns en il video.

Laschar ir video «Animaziun: il traffic da camiuns al San Bernardino»

Animaziun: il traffic da camiuns al San Bernardino

0:20 min, dals 2.2.2016

Remartga tar l'animaziun: i sa tracta da cifras approximativas da l'Uffizi federal per vias.

Chantun ed Astra quintan cun dapli traffic

Sche 1/10 dals vehichels, che van ussa tras il Gotthard, sviassan sin la ruta dal San Bernardino, lura sa dublegiass il dumber da vehichels sur quella ruta, uschia il cusseglier guvernativ Mario Cavigelli.

Era Guido Bielmann da l'ASTRA quinta cun dapli traffic, ed uschia era cun dapli accidents sin la ruta dal San Bernardino. Sch’i vegn uschè lunsch, n’èn midadas vid il tschancun al San Bernardino dentant betg planisadas. Sulet per in temps temporar na fetschia quai economicamain nagin senn. Mario Cavigelli è dentant dal maini, ch’i duvrass tar quai scenari en mintga cas investiziuns en la ruta dal San Bernardino.
Omadus speran dentant, che quai scenari na vegni gnanc en vigur. Els speran sin in gea ad in segund tunnel al Gottard.

Dapli traffic – cun il segund tunnel

In ferm augment dal traffic sin la ruta dal San Bernardino mussa in model da mobilitad da la firma svizra Senozon, quai dentant sch’in segund tunnel vegn bajegià. Sco ils adversaris d’in segund tunnel scrivan, stoppia il Grischun ed il Vallais quintar cun dapli ch’il dubel traffic da camiuns.

Co sanar il Gottard - segund tunnel è sulet ina varianta

Ch'il tunnel dal Gottard sto vegnir sanà na stat betg en dumonda. La gronda dumonda è dentant, co sanar u meglier ditg, tge duai schabegiar cun il traffic durant la sanaziun? I dat la varianta la pli enconuschenta: il segund tunnel dal Gottard. Davart quella ch'ei vegn votau la fin da fevrer.

Inschigniers grischuns cun ulteriuras variantas

I dat era anc duas autras variantas u ideas, da questas na vegn dentant betg votà. Tar ina satracti d'in'idea da l' inschignier da renum Christian Menn. El ha mess sin meisa l'idea da da construir ina ruta sur il pass dil Gottard. - In'autra idea ha Peter Hartmann, il planisader da traffic a Cuira. Tenor el fissan ils custs da sanaziun cun bien 250 milliuns fitg bass, almain en cumparegliaziun cun las autras variantas.

Grischuns enconuschan la situaziun sch'il Gottard è serrà

L'onn 2001, cura ch'il tunnel dal Gottard è stà serrà dals 24 d'october fin ils 22 da december suenter in grev accident cun fieu, è il traffic per gronda part svià sur la ruta dal San Bernardino, quai cun consequenzas malempernaivlas per il Grischun. Sch'il tunnel dal Gottard vegn serrà per pudair sanar el, pudessi capitar il medem sco lura. Il Telesguard ha rapportà la fin d'october 2001 davart la situaziun da traffic.