La chatscha sin tschiervs e chavriels duai vegnir reaverta per quatter dis dals 15 fin ils 31 d'october. Uschia statti en la missiva per la revisiun parziala da la lescha e l'ordinaziun da chatscha che la regenza grischuna ha deliberà.
Quels quatter dis n'èn dentant betg fixads. Els èn pussaivels, la regenza po tenor contigents decider sch'i è necessari. Er po ella, sco tar la chatscha extra, decider en tge regiuns ed er con ditg che quella chatscha d'october duai cuzzar.
Punct il pli dispitaivel
Tenor Mario Cavigelli il cusseglier guvernativ responsabel è quai il punct che saja il pli dispitaivel. Quai haja gia la fasa da consultaziun mussà. Durant quella ha l'uniun grischuna da chatschaders da patenta votà cunter quella chatscha d'october.
Ed er l'inspectur da chatscha dal Grischun Georg Brosi na vesa persunalmain nagins avantatgs. Anzi, la selvaschina vegnia anc disturbada pli fitg che quai saja uss il cas. El è da l'avis ch'il sistem actual saja sa cumprovà.
Render quint a l'iniziativa «Per ina chatscha etica che sa cumporta cun la natira»
La revisiun resguarda er differentas finamiras da l'iniziativa dal pievel che pretenda ina chatscha etica che sa cumporta cun la natira.Tranter auter duai vegnir scumandà la chatscha cun traplas. Medemamain duai vegnir francada l'obligaziun da tir per la chatscha tras l'obligaziun da relaschar normas da prestaziun liantas.
Plinavant vegni prescrit d'introducir ballas e ballins senza plum, uschespert che quai po vegnir responsà per motivs da segirezza e sin fundament da ponderaziuns da la protecziun d'animals. La finala duai esser scumandà d'ir a chatscha en in stadi d'alcoholisaziun u sut l'influenza surproporziunala da narcotics.
Patenta pli chara
Plinavant duai la patenta da chatsch'auta per indigens vegnir augmentada da 697 sin 800 francs. Er per chatschadras e chatschaders d'ordaifer duai vegnir augmentada la taxa da patenta, e quai per 14,8%.
Sch'il Cussegl grond desistiss d'introducir la chatscha d'october, stuessan las taxas per la patenta da chatscha’auta vegnir augmentadas per 7,6%, e quai per cuntanscher las finamiras menziunadas, uschia l’argumentaziun da la regenza.
Il Cussegl grond tracta la fatschenta en sia sessiun d'october.
Iniziants betg persvadì dal messadi
Ils iniziants da l'iniziativa encunter la chatscha supplementara enturn Christian Mathis èn da principi cuntents cun il messadi. El saja dentant betg formulà cler avunda. I vai persuenter ch'il messadi dat la pussaivladad a la regenza da dar liber quatter dis per la chatscha durant l'october. Quai dependa dentant dals contingents e da la regiun. Ils iniziants da l'iniziativa per ina chatscha etica che sa cumporta cun la natira n'èn insumma betg cuntents. Marion Theus manegia che l'iniziativa ditga memia pauc e porti nagut.
RR novitads 10:00
