Siglir tar il cuntegn

Header

video
Il quint annual dal chantun dal 2018 serra cun in surpli enstagl d'in minus
Or da Telesguard dals 07.03.2019.
laschar ir. Durada: 1 minuta 52 Secundas.
cuntegn

Chantun Quint 2018: Chantun fa gudogn operativ da 105 milliuns

Il Departament da finanzas e vischnancas valitescha il gudogn sco surprendent e fitg bun. Dal gudogn operativ da 105 milliuns francs restan la fin finala dentant mo pli 2.7 milliuns tar il gudogn total.

Il Departament da finanzas e vischnancas scriva che las finanzas dal chantun Grischun sa chattian en in bun stadi. Uschia quinta il chantun era gia cun in gudogn operativ en l'onn 2019.

Gudogn operativ vs. gudogn total

Avrir la boxSerrar la box

Il gudogn operativ è atgnamain quai ch'il chantun vegn d'influenzar. Plinavant chattan ins quest onn dentant er duas summas ch'il chantun po betg influenzar en il gudogn operativ:

  • restitutziun d'AutoDaPosta
  • distrubizun da banca naziunala

Quellas duas summas stuessan «tenor teoria» atgnamain appartegnair al resultat extraordinari. Pertge là chattan ins tut quai ch'il chantun po betg influenzar, sco per exempel la reserva per la HTW ch'il Cussegl grond ha decidì. Plinavant èn era augments/sperditas d'aczias integradas en il resultat extraordinari.

Las summas da la Banca naziunala e da l'AutoDaPosta èn quintads en il gudogn operativ perquai che quai è fixà uschia sin livel naziunal. Cun laschar quellas summas là èsi meglier pussaivel da far cumparegliaziuns tranter ils chantuns.

Ditg placativ è il gudogn total quai ch'il chantun ha pudì influenzar +/- quai ch'il chantun n'ha betg pudì influenzar.

Gudogn operativ dal 2018: 105 milliuns francs

Schegea ch'il chantun aveva budgetà in deficit da radund 33 miu. francs, èsi tuttina vegnì tar in gudogn aut. Quai ha trais facturs principals:

  • pli autas taglias dal chantun (cunzunt taglias da l'ierta, taglias sin donaziuns e taglias sin il gudogn tras la vendita da bains immobigliars)
  • distribuziun supplementara da la banca naziunala svizra
  • part dal chantun vi da restituziuns da la AutoDaPosta Svizra SA
Legenda:
Cumparegliaziun da budget e quint dal chantun Grischun

Resultat extraordinari dal 2018: -102.5 milliuns francs

Sut las posiziuns extraordinarias tutgan era augments/sperditas da valur tar aczias. La gronda part da quella cifra negativa da 102.5 milliuns è dentant fitg simpel da declerar:

Il parlament dal chantun ha durant la sessiun d'october 2018 detg gea ad ina reserva da 90 milliuns francs per prefinanziar il center planisà da scola auta per la HTW.

Gudogn total dal 2018: 2.7 milliuns francs

Cun subtrahar il resultà extraordinari (-102,5 milliuns) dal gudogn operativ (105 milliuns) resulta uschia la fin finala in lev plus da 2.7 milliuns francs.

audio
Mezdi: Quint dal chantun 2018 – Con vinavant cun il nov minister?
ord Actualitad dals 07.03.2019.
laschar ir. Durada: 2 minutas 25 Secundas.

RR novitads 10:00

Artitgels legids il pli savens