Raiffeisen Grischun ha fatg dapli gudogn

Las Bancas Raiffeisen dal Grischun pon guardar enavos sin in bun onn da fatschenta 2014.

Sedia principala da la banca Raiffeisen Surselva a Glion. Bild in Lightbox öffnen.

Legenda da maletgs: Sedia principala da la banca Raiffeisen Surselva a Glion. RTR, L. Livers

Il gudogn è creschì per passa 6% sin passa 28 milliuns francs. La raschun per questas cifras positivas sajan danovamain dapli emprests ipotecars e l'optimaziun dals custs, communitgescha la Raiffeisen.

La summa da bilantscha da las 9 bancas Raiffeisen dal Grischun è s'augmentada per 3,6% sin bun 5 milliardas francs. Latiers tutgan tranter auter l'administraziun da facultad da la clientella, e las immobiglias da la banca.

Serrar filialas er en il futur in tema

Il 2010 devi anc 63 filialas da la Raiffeisen en il Grischun. Il 2014 mo pli 45. Sco quai che la presidenta da l’Uniun grischuna da las bancas Raiffeisen, Petra Kamer, ha communitgà, stoppian ins era en il futur quintar, ch’ina u l’autra ulteriura filiala vegnia serrada. Definitivamain serrada el decurs da quest onn vegn la filiala ad Urmagn el Grischun central.

Sco quai che Petra Kamer ha detg envers RTR, vegnia segir era il dumber da bancas regiunalas a sa sminuir. Actulamain datti 9 bancas regiunalas da la Raiffeisen el Grischun.

Tranter quellas dettia segiramain ina u l'autra fusiun el decurs dals proxims onns.