Las cifras derivan da la statistica criminala da la polizia 2019 che tschiffa ils delicts denunziads. I sa tracta da 28 differents delicts, sco mazzaments, violaziun, metter maun vi d’ina persuna, fridas grevas, fridas levas, smanatschas, ingiurias etc.
Cifras fan star stut
Il 2019 ha la polizia registrà en Svizra 19’669 delicts en il ravugl dal dachasa. I sa tracta tant da grevs delicts sco mazzaments u emprovas da mazzar (79 cas) u dad acts sexuals cun uffants (383 cas).
Il pli fitg summeschan dentant pli levs delicts sco smanatschas (4314 cas) u sch’insatgi metta maun vi dad in partenari u in uffant (6379).
Tge che fa surstar è che mazzaments capitan pli savens a chasa (63%) e betg insanua en giassas stgiras. Era tar las violaziuns è la cumpart a chasa fitg auta (42%).
Relativar las cifras
Da resguardar èsi: La polizia registrescha ils delicts denunziads. Blers delicts entaifer la famiglia na vegnan dentant mai denunziads. Ins parta perquai da cifras zuppadas anc bler pli autas.
Tar las cifras dal Grischun èsi da resguardar che violenza a chasa vegn tegnida tschelà pli savens en regiuns ruralas ch’èn citads.
Umens e dunnas delinqueschan
En 75% dals cas èsi ils umens che commettan ils delicts a chasa, en 25% dals cas las dunnas. La statistica mussa en detagl las cumparts dad umens e dunnas tar la violenza visavi partenaris, ex-partenaris, uffants u auters parents.
