En vista a l'auta dumonda e l'offerta limitada sco era l'urgenza da cumprar avunda mascrinas, saja stà inevitabel ch'ils pretschs sajan creschids. Sclerir definitivamain las renfatschas da pretschs excessivs e ch'i haja dà usura, possia dentant be ina dretgira, scrivan ils auturs dal rapport. La controlla haja mussà ch'ils responsabels hajan organisà las mascrinas tenor il principi da la spargnusadad.
Er quai che pertutgia la qualitad da las mascrinas na dettia nagins gronds deficits. L'entir mund saja stà confruntà cun tals problems ed i saja da vart dal VBS vegnì fatg bler per garantir la qualitad da las mascrinas.
Il medem mument identifitgescha il rapport dentant er problems en il process da cumpra e cusseglia tranter auter da reveder quels. L'onn passà aveva l'apoteca da l'armada cumprà passa 300 milliuns mascrinas, quai per bunamain 200 milliuns francs.