Siglir tar il cuntegn

Header

audio
Rassissem en il GR: survista en il chantun
Or da Actualitad dals 09.06.2020.
laschar ir. Durada: 02:52 minutas.
cuntegn

Rassissem en Grischun Betg adina preschent, però tuttina existent

Rassissem datti en tut ils chantuns. Da quel avis è er il Cusseglier guvernativ Peter Peyer. Tge ch'el constatta davart la situaziun en Grischun:

Rassissem organisà, sco ina scena extrem dretga n'enconuschain nus betg. Là èn ils rapports da la polizia chantunala clers.
Autur: Peter PeyerCusseglier guvernativ

Sch'i va per quai che vegn mintgatant numnà «rassissem da mintgadi» – sch'insatgi na survegn per exempel betg ina abitaziun pervia da sia culur da la pel – na dettia dentant betg propi cifras precisas. La situaziun na saja dentant betg mendra co en auters chantuns.

352 cass da cussegliaziun

En blers chantuns datti in post da cussegliaziun aposta per dumondas da rassissem. En Grischun na datti nagin post sumegliant. Quels han dumbrà l'onn 2019 352 cussegliaziuns, quai è in nov record.

Tenor la genstiunaria da la Cumissiun federala cunter rassissem Alma Wiecken, na vul il augment dentant betg dir exnum, ch'i dettia dapli cass da rassissem en Svizra. Tenor ella hai er da far, ch'il tema è pli preschent ed uschia s'annunzian er bler daplirs.

Ils pli blers cass ch'ils posts cusseglian èn cass da rassissem a la lavur u cun tschertgar ina abitaziun. L'onn 2019 haja dentant er la categoria rassissem en il lieu public gì dapli cass. Quai è in punct che fa pissers ad ella.

Tschertga d'abitaziun e martga da lavur

In maletg sumegliant vesa Dorothee Pujol. Ella lavura tar la Crusch cotschna Grischuna ed è respunsabla per il programm d'integraziun da fugitivs. Quai è in programm che porscha accumpognament a fugitivs en il mintgadi. Tge ch'ella auda adina puspè è, ch'ils fugitivs hajan fadia da chattar ina abitaziun u ch'els han fadia da chattar ina plazza da lavur. Quai haja per ina er da far cun la culur da la pel, dentant betg mo. Er la lingua u simplamain il betg econuscher in'autra cultura fetschia mintgatant in pau temma.

RTR actualitad 07:00