Siglir tar il cuntegn

Header

Maletg simbolic
Legenda: Keystone
cuntegn

Rassissem en il Grischun Dovri in post da cussegliaziun spezial en il chantun?

En blers chantuns datti in post da cussegliaziun spezial per dumondas da rassissem. Uschè in giavischass la Cumissiun federala cunter rassissem er en Grischun. Tenor Cusseglier guvernativ Peter Peyer na para il basegn dentant betg d'esser qua.

Tenor la Cumissiun federala cunter rassissem stoppia mintga chantun avair in servetsch da cussegliaziun per cas rassistics. En il Grischun porscha per il mument be il post d'integraziun da l'Uffizi da migraziun uschè in servetsch. Per Alma Wiecken è quai dentant memia pauc.

Il problem ch'jau ves è, ch'il post na communitgescha betg propi, ch'els porschan discurs per unfrendas da discriminaziun [...].
Autur: Alma WieckenGestiunaria Cumissiun federala cunter rassissem

Tenor las experientschas ch'els hajan fatg en auters chantuns, haja in sevetsch il pli grond effect, sch'el è cler definì sco post per dumondas da rassissem. La varianta in pau zuppada en Grischun saja memia pauc, manegia Alma Wiecken.

«..nagina dumonda...»

Tenor il schef dal Departament da giustia Peter Peyer na dettia per il mument nagin basegn per uschè in post spezial.

Dapi ch'jau sun en uffizi n'è mai vegnì uschè ina dumonda, ni dal Cussegl grond, ni da terzs, ni da privats [...].
Autur: Peter PeyerCusseglier guvernativ

En cas d'ina dumonda davart uschè in post sclerissan els dentant sche in tal post fa basegn.

Post d'integraziun chantunal

Textbox aufklappenTextbox zuklappen

Il Grischun è il post d'integraziun chantunal il lieu che porscha discurs sch'i va per rassissem. Tenor la manadra dal post d'integraziun Patricia Ganter Sonderegger hajan els dentant mo paucs cass mintg'onn che vegnan explicit pervia d'in cass da rassissem. A singuls cass possian els gidar bain. Tenor la manadra sajan ils cass dentant pel solit fitg cumplitgads ed era fitg persunals. Là manchian era las ressoursas e mintgatant er las cumpetenzas per gidas a moda adqueata.

Ina buna part da las persunas che s'annunziar tar ella, dettian els vinavant ad in post da cussegliaziun giu Turitg.

Per il mument dettia tenor Peter Peyer avunda autras pussaivladads per pertutgads da s'annunziar. Quai per exempel tar in sindicat u tar il servetsch ch'il post d'integraziun porschia. Tenor Alma Wiecken saja uschia pli difficil da tegnair la survista. Vinavant haja in post central dapli effect, manegia ella.

«S'annunziai tar la polizia»

Peter Peyer recumonda per il mument, d'annunziar tut ils cas che pudessan avair in connex cun rassissem a la polizia u a la procura publica. Delicts cunter la norma penala cunter discriminaziun sajan delicts uffizials. Vul dir: er betg pertutgads pon annunziar in cas. Vinavant sto l'autoritad da persecuziun investigar il cas. Tenor Peter Peyer vesan ins uschia cas er en la statistica ed els possian decider meglier, sch'i dovra per exempel dapli resursas cunter il rassissem.

Er la gestiunaria da la Cumissiun federala cunter rassissem è da l'avis, ch'ins sto mintgatant er denunziar in cas. Ella è dentant da l'avis, ch'in post da cussegliaziun explicit per dumondas da rassissem pudess schon avant intermediar ed evitar uschia che mintgin sto ir tar la procura publica.

RTR actualitad 07:00

Artitgels legids il pli savens

Scrollar a sanestra Scrollar a dretga