Siglir tar il cuntegn

Chantun Rathgeb daventa nov president da la SwissDRG

Il president da la regenza grischuna Christian Rathgeb è il nov president da la SwissDRG. Rathgeb sesa dapi ils 31 d'october 2014 en il cussegl d'administraziun da la SwissDRG.

Christian Rathgeb.
Legenda: Il president da la regenza Christian Rathgeb nov president da la SwissDRG. RTR, I. Mainka

Cusseglier guvernativ Christian Rathgeb remplazza il cusseglier guvernativ dal chantun Turitg Thomas Heiniger. Dal cussegl d’administraziun da la SwissDRG fan part ils represchentants da la conferenza svizra da las directuras e directurs chantunals da sanadad, represchentants da la H+, dals ospitals da la Svizra, da santésuisse sco er da la cumissiun da tariffas medicinals e da la Federaziun dals medis svizzers FMH.

Bleras mesiras vegnan cumpensadas cun pauschalas

La lescha federala davart l’assicuranza da malsauns ha incumbensà la SwissDRG d'elavurar, sviluppar vinavant e d'adattar il sistem da pauschalas. Ils tractaments staziunars en ospitals vegnan indemnisads tenor prestaziun cun pauschalas tenor grevezza. Uschia vegn mintga dimora a l’ospital classifitgada tenor tscherts criteris.

Il cussegl d’administraziun vul uss ch’era cas da dimora staziunara en clinicas da reabilitaziun e clinicas psichiatricas pon vegnir indemnisadas cun pauschalas, quai a partir dal 2018.

RR novitads 10:00