Ils territoris da skis en Grischun restan averts sur la fin d'emna. Glindesdi decida la regenza co vinavant. Quai han declerà ils cussegliers guvernativs Peter Peyer e Marcus Caduff ad ina conferenza da pressa. Uschia resta la dumonda averta sche las pendicularas han avert sur Nadal e Bumaun en Grischun. Dus chantuns – Lucerna e Sviz – han decidì da serrar ils territoris da skis dals 22 fin ils 29 da december.
La situaziun è oz venderdi quella che nus pudessan avrir.
Glindesdi saja ina giada da pigliar la decisiun sche avrir u betg e lura saja da decider da di tar di co la situaziun sa sviluppia. Ma i na saja betg da quintar ch'ils territoris stoppian serrar dad in di sin l'auter. Tut tenor svilup stoppian ins lura dar a la branscha il signal che la situaziun vegnia memia precara.
Indemnisaziuns per gastronomia
Sco Marcus Caduff ha declerà quinta el che la branscha da gastronomia vegnia a far radund 200 milliuns francs pli paucas entradas. Radund 70 milliuns da quels na vegnian ins betg d'indemnisar cun l'agid d'enfin uss sco la lavur curta. Perquai pretenda il chantun uss che la Confederaziun ageschia.
