Siglir tar il cuntegn

Header

cuntegn

Reacziun sin l'expertisa Mario Cavigelli na vul betg chastiar anteriurs responsabels

Sin incumbensa da la regenza han dus experts prendì sut la marella la rolla dal chantun en il cartel da construcziun. Ils resultats èn uss sin maisa.

Er ils dus experts vegnan a la conclusiun ch'il chantun na saja betg stà activamain involvì en las fatschentas dal cartel. Quest fatg prendia la regenza per enconuschientscha. Sco che Mario Cavigelli, manader dal Departament da construcziun, ha ditg envers RTR, prendia il chantun l'expertisa sco basa per optimar ils process da surdada.

En il rapport stat dentant er scrit nair sin alv, che anteriurs superiurs en l'uffizi hajan tralaschà da reagir sin las infurmaziuns ch'els han survegnì dad Adam Quadroni.

audio
Cartel: Mario Cavigelli davart consequenzas per persunal
02:24 min, Actualitad dals 10.06.2021.
laschar ir. Durada: 02:24 minutas.

Encunter ils trais lavurants che n'hajan betg reagì a moda adequata na veglia la regenza dentant prender naginas consequenzas strictas. Quellas persunas hajan da principi fatg buna lavur. Er ils davos onns, cun cumenzar a restructurar ils process interns, hajan els mussà buna veglia. Ins veglia dentant tuttina tschertgar il discurs.

audio
Co vesi or cun ina stgisa u remuneraziuns per Adam Quadroni?
02:16 min, RTR Audio dals 10.06.2021.
laschar ir. Durada: 02:16 minutas.

Reacziun da Stefan Engler

Avant Mario Cavigelli era Stefan Engler il manader dal Departament chantunal da construcziun. Sco ch'el ha ditg envers RTR saja el surlevgià, ch'ils rapports mussan ch'il chantun n'è betg involvì directamain en il cartel. Ina dumonda che resta anc averta saja, daco che las infurmaziuns da whistleblower n'èn betg vegnids fin tar el.

Sch'i haja dà sbagls en l'uffizi, lura pertutgia quai l'entira instituziun – er el sco (anteriur) manader. Las circumstanzas da quels sbagls sajan dentant decleradas en ils rapports.

Sin la dumonda sch'el lessia sa perstgisar tar Adam Quadroni, respunda l'anteriur cusseglier guvernativ: «Igl è l'incumbensa da la regenza actuala da trair las conclusiuns e decider co sa cuntegnair envers il whistleblower».

audio
Reacziun da Stefan Engler sin ils rapports
03:22 min, Actualitad dals 10.06.2021.
laschar ir. Durada: 03:22 minutas.

RTR actualitad 17:00

Artitgels legids il pli savens

Scrollar a sanestra Scrollar a dretga