«La Terrassa» a Scuol
Causa che la stagiun morta è davant porta è la gastronomia s'endisà vi da pli pauc travasch durant quest temp. Grazia la midada sin take away e cun bler sustegn da la clientella indigena che nizzegia era questa purschida n'ha il restaurant «La Terrassa» almain sur mezdi betg bler pli pauca svieuta, di Corina Mengiardi. Ma sch'els na possian betg avrir sin il temp da stad e sch’ils turists restian davent questa stad guardia ora mal per l'avegnir.
Nus n'essan betg persvas che nus survivain quest qua.
Hotel «Casa Tödi» a Trun
Per Manuel Reichenbach da l’hotel «Casa Tödi» resta blera malsegirtad. Quai che dettia da pensar saja, cura che la stagiun da stad cumenza. A partir dal matg vegnian ils giasts. Els na sappian era betg cura ch'els possian avrir. El na stoppia dentant betg temair per l'existenza.
Nus avain in'empernaivla situaziun che nus essan in manaschi pitschen e n'avain betg uschè gronds custs da persunal.
Restaurant «Rätushof» a Cuira
Horst Salut dal restaurant «Rätushof» amez la citad da Cuira bada gia uss fitg ferm il donn ch'il lockdown ha chaschunà. Normalmain fissan da quest temp e cun quest'aura il restaurant e la terrassa emplenids cun clientella.
Jau n'hai nagina chapientscha ch'il Cussegl federal n'ha gnanc menziunà mesiras da schluccament u dat almain perspectivas a la pli gronda branscha da patruns en noss pajais.
Atgnamain fissan el e sia dunna pensiunads quest onn. Causa ch'els n'han betg ina cassa da pensiun lavuran els vinavant. Ed uss vegnan duvradas era anc tut las reservas ch'els han pudì metter da la vart enfin uss.
