Siglir tar il cuntegn
Inhalt

Chantun Reclama dad ospitals vilenta Rathgeb

L'ospital da l'universitad da Turitg ha l'ultim temp fatg reclama cun placats per ses servetschs en la regiun da Tavau.

Placat cun l'inscripziun: Unsere Zimmer müssen Sie nicht im voraus buchen.
Legenda: Placat da reclama da l'ospital da l'universitad a Turitg. MAD

Ils placats da reclama da l'ospital da l'universitad da Turitg a Tavau han vilentà il cusseglier guvernativ Christian Rathgeb. I na possia betg esser ch'il grond ospital da l'universitad da Turitg emprovia da prender davent pazients als pitschens ospitals grischuns, ha declerà Rathgeb envers il schurnal regiunal da SRF.

Nagina reclama – mo prevenziun

L'ospital da l'universitad percunter argumentescha ils placats da reclama cun la schelta libra da l'ospital che vala dapi il 2012 en Svizra. Perquai sajan els en concurrenza cun ils ulteriurs ospitals. Els na fetschian dentant nagina reclama classica. Els communitgeschian mo per la prevenziun, ha declerà Dajan Roman da la communicaziun da l'ospital da l'universitad envers il schurnal regiunal.

Sco reacziun sin la campagna da reclama, ha Rathgeb creà cun in tschegn d'egl ensemen cun sia secretaria da departament agens placats.

Placat: Ihr Missgeschick beim sommerlichen Bad professionel versorgt und kuriert an frischer Bergluft. Es grüssen Sie herzlich Ihre Bündner Spitäler. Cun in maletg dal Lai da Turitg.
Legenda: La betg dal tut seriusa cuntraproposta dal departament. MAD

RR actualitad 06:00