2'200 provas ha l'uffizi per la segirtad da victualias fatg l'onn passà. Tar in tschintgavel da quellas hai dà insatge da reclamar. Quai è da leger en il rapport annual. Tar spaisas pre-cuschanadas, sco per exempel pasta, legums u pesch ha l'uffizi constatà en media tar mintga terz problems d'igiena.
Dentant era eveniments da sport han ils controlladers prendì sut la marella: Trais da 28 provas da bavrondas isotonicas, te u buglion n'han betg correspundì a las pretensiuns d'igiena.
Transports en il turissem da chatscha
Dasper la gastronomia è dà en egl ch'ils chatschaders èn memia pauc infurmads sut tge cundiziuns ch'els pon importar charn selvadia da lur chatscha en l'exteriur. En l'Engiadina haja la polizia tegnì si in transport cun charn selvadia betg sfradentada. Tals transports n'èn betg igienics e pon chaschunar che la qualitad da la charn va a la malura, plinavant n'è quai betg lubì tenor la lescha.
RR novitads 12:00