En media èn ils pumpiers dal Grischun vegnids clamads l'onn passà trais giadas il di. En tut èn els stads 1'200 giadas en acziun. Tenor Hansueli Roth, inspectur da pumpiers tar l'Assicuranza d'edifizis dal Grischun, è quai bain in dumber da record, però anc betg ina cifra alarmanta. La summa da donns munta a 18 milliuns francs per il 2018. Questa summa correspunda a la media dals ultims 10 onns.
Di e notg pront per servetschs
Ils pumpiers na vegnan dentant betg sulettamain clamads, cura ch'igl arda insanua, els fan prevenziun da donns en general. Uschia prestan els agid immediat e quai durant 24 uras il di tar:
- brischaments ed explosiuns
- eveniments da la natira
- salvament e tschertga da persunas ed animals
- eveniments che fan donn a l'ambient u pericliteschan quel
- acziuns per proteger la populaziun
- accidents dad ieli e chemia ed accidents sin via cun engaschaments specials
Pumpiers èn daventads pli professiunals
Avant 20 onns devi var 10'000 pumpiers en il chantun Grischun. Oz èn quai mo pli radund 4'000. La raschun per questa reducziun èn diversas fusiuns dad uniuns da pumpiers en il chantun. En il medem mument è però er la scolaziun dals pumpiers vegnida meglierada ed ils pumpiers èn daventads pli professiunals.
Actualmain datti en Grischun en tut 57 corps da pumpiers. Malgrà ch'igl ha il mument avunda pumpiers è la pli gronda sfida per il futur da recrutar dapli pumpiers.
RR actualitad 07:00
