Siglir tar il cuntegn

Header

Purtret d'in luf.
Legenda: Keystone
cuntegn

Referendum reussì Pievel decida davart protecziun dal luf

Ils 17 da matg po il suveran decider davart ina protecziun dal luf main ferma. Il referendum cunter la lescha da chatscha revedida è gartegià, communitgescha la Chanzlia federala. 58'570 suttascripziuns èn valaivlas. Tenor las organisaziuns per l'ambient e per la protecziun d'animals, resguarda la nova lescha memia pauc la protecziun da las spezias.

Il parlament aveva decidì il 2019 da schluccar la protecziun dal luf e dad autras spezias. Las autoritads duain avair la cumpetenza da reglar la populaziun, senza che lufs han fatg donns e senza ch'ins ha prendì mesiras da protecziun. Er en zonas da protecziun duai esser lubì da sajettar il luf.

Augment da deducziuns per uffants tar taglia federala

Era avunda suttascripziuns ha, tenor la Chanzlia federala il referendum cunter l'augment da las deducziuns per uffants tar la taglia federala. Il referendum ha piglià la Partida socialdemocratica. Inoltrà han els 53'088 suttascripziuns valaivlas.

Il Cussegl federal aveva l'entschatta vulì discutar d'augmentar la deducziun maximala per la tgira dals uffants entras terzs da 10'000 sin 25'000 francs. Quai avess custà 10 milliuns francs. Il parlament ha dentant decidì dad er auzar la deducziun generala per uffants tar la taglia federala da 6'500 francs, sin 10'000 francs. Cun quai duain vegnir stgargiadas famiglias che tgiran a chasa lur uffants. Quai purtass tenor la PS 370 milliuns francs pli pauc en la cassa federala.

RTR novitads 17:00