Regenza fa tut per survegnir invista en las actas da la WEKO

Suenter las examinaziuns da la cumissiun da concurrenza en Val Müstair en connex cun cunvegnas da pretschs, sa stenta il chantun vinavant per invista en las actas.

logo da la WEKO Bild in Lightbox öffnen.

Legenda da maletgs: Il chantun vul invista en las actas da la cumissiun en connex cun las examinaziuns en Val Müstair. Keystone

La regenza grischuna emprova vinavant da survegnir invista en las actas da la cumissiun da concurrenza WEKO. Quai ha il cusseglier guvernativ Mario Cavigelli respundì sin ina dumonda che vegnida fatga dal deputà Beat Deplazes.

La WEKO ha examinà cunvegnas da pretschs che pliras firmas da construcziun da la Val Müstair han fatg tranter il 2004 ed il 2012 tar passa 100 concurrenzas.

Cura ch'il chantun survegn invista en las actas vul el da sia vart examinar las pussaivladads giuridicas, saja quai sin basa dal dretg da submissiun, dretg civil u dretg penal.

Lunga discussiun

Radund in'ura e mez han deputadas e deputads discutà davart cunvegnas da pretschs e da la WEKO. Il deputà da la PBD Ueli Bleiker ha manegià ch'el stoppia gea l'auter onn betg vegnir reelegì e possia uschia er dir da quai che na plascha betg al parlament. El ha numnadamain manegià che cunzunt firmas pitschnas en la periferia stoppian tut tenor guardar da reparter in zic la lavur, betg far cunvegnas da pretschs, dentant per salvar plazzas da lavur na sajan cunvegnas betg da principi insatge schlet.

«  Tar questa entira tematica vegni sajettà cun chanuns sin paslers. »

Ueli Bleiker
deputà PBD

Tut auter ha il deputà liberaldemocrat Rudolf Kunz vis la chaussa. Far cunvegnas davart las offertas saja exactamain uschè schlet sco da far cunvegnas davart ils pretschs è el persvas. Ed er Jon Pult dals socialdemocrats ha vis quai sumegliant.

«  Deplorablamain na para il problem betg mo dad esser uschè pitschen sco in pasler, mabain fitg grond. »

Jon Pult
deputà PS

Tenor Jon Pult na saja quai er betg be in problem per la branscha da bajegiar, mabain er per l'economia ed er per la credibladad puncto stadi da dretg.

RR novitads 16:00