Durant la crisa ha la regenza grischuna decidì en tut 57 conclus. 12 da quels sa basan sin il dretg d’urgenza. Quai ha ditg il president da la regenza grischuna Christian Rathgeb al cumenzament da la sessiun dal Cussegl grond. Igl è l’emprima giada insumma che la regenza grischuna ha stuì far diever da quest artitgel d’urgenza en la constituziun – sco la chanzlia chantunala ha confermà sin dumonda dad RTR.
Uss saja dentant uras ch’il parlament discuteschia puspè, uschia Christian Rathgeb. Plinavant dettia in’analisa cun experts externs per valitar la lavur dal chantun durant la crisa da corona. Las consequenzas finanzialas per il Grischun na sajan anc betg enconuschentas. El quintia dentant quest onn cun in deficit, ed era l’auter onn cun pli paucas entradas da taglia.
La pandemia n’è anc betg a fin
Il minister da sanadad Peter Peyer ha dà in sguard enavos dapi ch’il coronavirus è vegnì chattà en la China. Malgrà ch’i saja capità extrem bler dapi lura, saja bler anc nunenconuschent: I na saja betg cler sch’ina persuna infectada cun il coronavirus saja propi immuna, i na dettia anc nagin test precis dad anticorpuls e surtut na dettia anc nagin vaccin. Perquai ha el conludì ses pled: La pandemia n’è anc betg a fin.
Crisa da corona en l'economia
Passa 3'600 persunas èn cun la fin da matg stadas senza lavur en il Grischun. Quai è 3,3% da las persunas che lavuran. Quai saja ina quota fitg auta per il Grischun ed er sur la media svizra, uschia ha declerà il minister d'economia Marcus Caduff. La crisa sa mussia er en las cifras da lavur curta - totalmain han passa 5'800 fatschentas stuì annunziar per passa 51'000 collavuraturs lavur curta. Quellas fatschentas sajan vegnidas indemnisadas cun totalmain 75 milliuns francs. Per cumparegliar: anc il favrer avevan be 5 fatschentas annunzià lavur curta.
Sin fin settember midada en bajetg Sinergia
L’administraziun chantunala fa a partir da mez avust midada en il center d’administraziun Sinergia a Cuira. Quai ha il cusseglier guvernativ Mario Cavigelli annunzià en il Cussegl grond. El quinta che la midada saja finida sin ils 25 da settember.
Pervia dal coronavirus aveva la regenza stuì spustar la midada. Quella fiss stada previsa la fin da mars. Quai na saja betg stà uschè simpel, cunquai ch’ins haja stuì prolungar contracts da locaziun per ils uffizis ch’avessan gì da far midada. En tut duain 440 persunas da 14 partiziuns lavurar en il center d’administraziun Sinergia.
