Siglir tar il cuntegn

Chantun Regenza grischuna è consternada

La regenza grischuna è consternada da la dimensiun dals cartels en la branscha da construcziun. Ella condemneschia en tutta furma las cunvegnas da pretschs ch'èn vegnidas fatgas tranter las firmas. Quellas sajan illegalas e betg tolerablas, hai num en la communicaziun.

Legende: Video Mario Cavigelli di cleramain ch'i duai dar consequenzas severas abspielen. Laufzeit 1:35 Minuten.
Or da Telesguard dals 26.04.2018.

Il chantun haja pretendì invista en tut las actas da la WEKO. Uschè spert ch'ins haja quellas, vegnian examinads pass giuridics cunter las firmas pertutgadas. Tenor la WEKO èn il chantun, las vischnancas ed er privats, ch'han surdà lavurs a questas firmas, vegnids donnegiads considerablamain. La WEKO ha oz publitgà sentenzias cunter 7 firmas da construcziun.

Chantun vul optimar process interns

Gia suenter l'entschatta da las examinaziuns da la WEKO il 2012 ha il chantun instradà mesiras per proteger il proceder correct per surdar projects. Il Departament da construcziun, traffic e selvicultura ha sviluppà in sistem da monitoring per pussibilitar a las autoritads d'intervegnir a moda svelta en cas ch'i dettia indizis per novas cunvegnas da pretschs. Ulteriuras mesiras sco scolaziuns internas, glistas da check etc. sajan part dal pachet da mesiras. Las mesiras vegnian adina adattadas e schlargiadas.

La situaziun vegnia plinavant observada vinavant cun gronda attenziun.

RR novitads 15:00