Las differenzas tranter las vischnancas èn grondas pertutgond las entradas ed expensas. Uschia ha Furna atgnas entradas da 21%. Percunter ha Farera atgnas entradas da passa 600%.
Pajar pauc u pajar bler
Tar las vischnancas deblas che survegnan ils blers daners tutgan tranter auter Furna, Verdabbio, Maton e Farschno. Quellas che ston pajar il bler èn Farera, Schlarigna, San Murezzan e Sufers.
Da la gulivaziun da las grevezzas geografic-topograficas e da la scola profiteschan 55 vischnancas. Qua stattan a disposiziun 24 milliuns dal chantun.
Barbara Janom Steiner è cuntenta
La ministra da finanzas dal Grischun, Barbara Janom Steiner è cuntenta ch’ella ha pudì preschentar oz ils resultats da la nova gulivaziun da finanzas che va en vigur a partir dal 2016. Ins haja discutà bler davart quest project ch’ha cumenzà avant prest 10 onns.
Quai è in bel di per nus. Ussa spetgain nus anc sin las reacziuns or da las vischnancas.
Il punct il pli allegraivel cun la nova gulivaziun da finanzas è tenor cussegliera guvernativa, Barbara Janom Steiner, ch’il Grischun ha ussa in sistem nov e modern ch’è cumparegliabel cun quel ch’ils chantuns hajan cun la Confederaziun.
«I vegn uschia pli simpel per nus ed i dat era damain lavur administrativa», uschia Barbara Janom Steiner. «L’impurtant è dentant che nus pudain egualisar las differenzas tranter las vischnancas e dar a las vischnancas dapli autonomia en las finanzas.»
Differentas vischnancas, medema malcuntentientscha
Schlarigna paja cun il nov sistem dapli en la gulivaziun da finanzas. Quai constat almain per il 2016, schegea ch’igl è grev da cumparegliar il nov sistem cun il vegl. «Quai n’è betg legraivel», di il president communal da Schlarigna, Christian Brantschen. Bunamein 1,5 milliuns francs sto Schlarigna pajar. Tge influenzas che quai ha sin las investiziuns na sa Brantschen betg anc dir.
In mez milliun pli pauc
Dumeni Tomaschett da Trun è in ulteriur president vischnanca che n’è betg cuntent cun las midadas. Ils motivs èn dentant auters che tar Schlarigna. Trun n’ha betg da pajar dapli cun il nov sistem, survegn ussa dentant pli paucs daners or da la gulivaziun da finanzas.
Per il 2016 survegn Trun radund 500’000 francs pli pauc ch’avant.
Uschia datti cun il nov sistem anc radund 1 milliun francs per Trun – radund in mez milliun francs pli pauc ch'avant. E quella summa vegn anc a sa sminuir. Pertge il sustegn supplementar che 8 vischnancas survegnan en ina fasa da transiziun, tranter quellas er Trun, scroda suenter 5 onns.
Esser semtgà sin la midada
Tenor la cussegliera guvernativa, Barbara Janom-Steiner duessan dentant las vischnancas che survegnan pli paucs daners entras la midada da sistem, esser semtgadas sin la midada suenter 5 onns.
