Siglir tar il cuntegn
Inhalt

Chantun Regenza grischuna refusa l'iniziativa da linguas estras

L'iniziativa che pretenda mo ina lingua estra en scola primara saja discriminanta. Perquai duai il Cussegl grond refusar l'iniziativa e zuar senza cuntraproposta. Quai scriva la regenza grischuna en ses messadi per mauns dal parlament.

Legende: Video Regenza è cunter l'iniziativa da linguas estras abspielen. Laufzeit 02:41 Minuten.
Or da Telesguard dals 21.03.2018.

Sche l'iniziativa da linguas estras vegniss realisada strictamain tenor il text muntass quai che las scolaras ed ils scolars dal Grischun talian e rumantsch cumenzassan cun l'englais sco lingua estra il pli baud il 7. onn da scola. Quai fiss ina clera discriminaziun, argumentescha la regenza grischuna.

Discriminar nagin

Ins pudess bain evitar quest dischavantatg enten porscher ina segunda lingua sco rom facultativ. Questa purschida na stuess ins dentant betg mo porscher en il Grischun talian e rumantsch, mabain er en il Grischun tudestg. Sco consequenza avessan las scolaras ed ils scolars che cuntanschan il stgalim superiur differents nivels d'englais. Lura fissan necessarias instrucziuns en almain duas differentas gruppas da nivel.

Las sfidas organisatoricas e finanzialas per realisar l'iniziativa da linguas estras senza chaschunar discriminaziuns fissan fitg grondas.

Iniziativa da linguas estras

Ils iniziants vulan ch’i vegnia be pli instruì ina lingua estra en la scola primara. En las regiuns rumantschas e talianas dal chantun vegniss uschia be pli instruì il tudestg. Ed en las regiuns tudestgas l’englais.

Nagina cuntraproposta

La regenza propona al Cussegl grond da refusar l'iniziativa da linguas estras e zuar senza cuntraproposta. Il Cussegl grond tracta l'iniziativa en la sessiun da zercladur 2018.

L'onn 2015 aveva il Cussegl grond declerà nunvalaivla l'iniziativa e quai cleramain cun 82 cunter 34 vuschs.

La dretgira administrativa è lura dentant stada d'in auter avis ed ha decidì che l'iniziativa saja valaivla ed era il Tribunal federal ha confermà questa sentenzia il matg 2017.

RR novitads 12:00