Siglir tar il cuntegn

Header

audio
Corona: Chantun vul testar regularmain en scola uffants e scolastAs
Or da Actualitad dals 02.02.2021.
laschar ir. Durada: 2 minutas 40 Secundas.
cuntegn

Regenza grischuna Tests regulars per magistraglia, scolars e scolaras

Il chantun Grischun vul testar a l’engronda en las scolas. La Scol’auta da pedagogia saja vidlonder d’instradar tut per che scolaras e scolars e la magistraglia pon sa laschar testar regularmain, dentant facultativamain, ha ditg il minister d'educaziun Jon Domenic Parolini. I duai vegnir fatg tests da spida, nua ch'i na dovra betg il bastunet en il nas e nua ch'il resultat è gia il proxim di sin maisa.

Nus essan persvas ch'ils tests che nus vulain far en tut las scolas, sch'ellas èn prontas, èn in bun med per eruir uschè spert sco pussaivel cas positivs e lura trametter quels en quarantina per evitar ch'il virus sa derasia.
Autur: Jon Domenic Parolini cusseglier guvernativ

Tranter auter sajan ins er vid organisar ulteriurs pilots – er en scolas grondas. Enfin che las scolas possian propi cumenzar a testar, giaja dentant anc duas fin trais emnas. La finamira è tenor Parolini da pudair laschar avert las scolas. Ulteriuras mesiras sco mascrinas er en la quarta u tschintgavla classa da la primara u prolungar las vacanzas da sport vegnian discutadas, decidì na saja però anc nagut.

video
Strategia en las scolas: Testar empè da serrar
Or da Telesguard dals 02.02.2021.
laschar ir. Durada: 2 minutas 11 Secundas.

Runda d'experts beneventa idea dal Grischun

Il departament da sanadad BAG beneventa ils tests regulars en las scolas ch'il chantun Grischun vul far. Ins vesa positiv ch'il chantun tegnia vinavant sia funcziun d’exempel puncto testar. Las datas dals tests sajan in agid per analisar la situaziun.

audio
Per tadlar curt e cumpact
ord RTR Audio dals 02.02.2021.
laschar ir. Durada: 57 Secundas.

Il BAG di vinavant ch’ins tegnia la situaziun en las scolas en egl. Sche las cifras d'infecziuns creschain pli svelt – tranter auter causa la mutaziun – sajan las scolas in lieu nua che contacts pon vegnir evitads. Dentant saja il serrar las scolas ina decisiun politica.

RTR novitads 14:00 / actualitad 17:00

Artitgels legids il pli savens