Siglir tar il cuntegn
Inhalt

Chantun Regenza ordinescha examinaziun externa

Las renfatschas fatgas en connex cun las cunvegnas da pretschs che la WEKO ha intercurì duain vegnir examinadas.

Purtret da la regenza grischuna.
Legenda: La regenza grischuna vul laschar examinar extern las renfatschas en connex cun la WEKO ed era l'acziun da polizia cunter l'infurmant Quadroni. Keystone

La regenza vul ch'in post extern examinescha ils process da surdada da projects en l'uffizi da construcziun bassa. En spezial era en connex cun il temp che la WEKO ha examinà dal 2004 enfin il 2012. Clamada vegn en quest cas ina persunalitad adattada ordaifer dal chantun.

L'uffizi chantunal da construcziun bassa ha concedì d'avair survegnì il 2009 infurmaziuns davart in cartel en l'Engiadina. Ils documents sajan però stads memia vegls, uschia Reto Knuchel da l’uffizi da construcziun bassa envers RTR. L'infurmaziun na saja lura betg vegnida dada enavant a Stefan Engler, il manader dal departament da quai temp.

Era process tar la polizia vegnan examinads

Independentamain da quai vegnan era examinads ils fatgs enturn l'acziun da polizia en connex cun l'arrestaziun dad Adam Quadroni respectiv il sectur da cumpetenza dal departament da giustia, segirezza e sanadad. Ils process vegnan examinads da Dr. Andreas Brunner, anteriur procuratur public general dal chantun Turitg.

A la polizia chantunala vegn renfatschà ch'ina truppa speziala haja arrestà il whistleblower, Adam Quadroni il 2017 sin moda violenta. Christian Rathgeb, il cusseglier guvernativ responsabel e Walter Schlegel, il cumandant da la polizia stattan dentant davos lur glieud. I vegnia dentant sclerì internamain l'agir da la polizia.

RR novitads 14:00