Siglir tar il cuntegn
Inhalt

Chantun Regenza vul installar sistem d'alarm pervia dals lufs

Suenter che lufs en il Grischun han stgarpà dapi l'entschatta da l'onn 115 animals da niz less la regenza in sistem d'alarm.

Tschintg nursas sin ina pastira
Legenda: Er auters chantuns e pajais lavuran cun in sistem d'alarm che duai tranter auter proteger muntaneras da nursas. (maletg simbolic) Keystone

Dapi l'entschatta da l'onn han ils lufs en il Grischun stgarpà 115 animals da niz. 59 da quels sulet sin l'Alp Stutz sur Spleia. L'entir onn passà eran quai 93 animals da niz stgarpads – uschia ha il cusseglier guvernativ Mario Cavigelli infurmà durant l'ura da dumondas en il Cussegl grond.

Memia pauc infurmaziun da las autoritads

Tenor Reto Crameri da la PCD sajan populaziun e purs memia pauc infurmads sche lufs sajan en la regiun u betg. Perquai ha el vulì savair da la regenza sch'ella haja en il senn da megliurar questa communicaziun. Cusseglier guvernativ Mario Cavigelli ha respundì ch'i dettia il mument lufs al Calanda, en Surselva, en Valragn, en l’Engiadina, en Bregaglia en il Mesauc ed er en il Parc naziunal. Pia saja quai da quintar dapertut ed adina ch’in luf sappia cumparair. La populaziun sappia per exempel s’infurmar sin la pagina d’internet da la protecziun da muntaneras u er tar l'uffizi da chatscha. En differentas regiuns dal chantun dettia quai er gruppas da «whats app» u e-mail nua ch’ils purs pertutgads vegnian infurmads. Plinavant ha Cavigelli er ditg ch'il chantun veglia introducir in sistem d'infurmaziun ed alarm.

Avertir cun sistem d'infurmaziun ed alarm

Per infurmar ed avertir meglier la populaziun e surtut l'agricultura en l'avegnir, vegnia perquai installà ils proxims mais in sistem d'infurmaziun e d'alarm che vegnia manà central. Mario Cavigelli ha dentant suttastritgà ch'i na dettia er cun in sistem d'alarm ina segirtad absoluta. Pertge il radius dal luf saja propi gronds.

RR novitads 11:00