Siglir tar il cuntegn
Inhalt

Chantun Remo Stoffel betg sin la glista dals pli ritgs Svizzers

19 Grischuns èn sin la glista dals 300 pli ritgs Svizzers. Sin plaz 1 è Charlene de Carvalho-Heineken. L’impressari da gervosa da la Ollanda abita a San Murezzan ed ha ina facultad da 10 fin 11 milliardas francs. Betg sin la glista cumpara dentant l’impressari da Val S. Pieder, Remo Stoffel.

Il magazin Bilanz na sa betg quant che Remo Stoffel posseda propi.
Legenda: Il magazin Bilanz na sa betg quant che Remo Stoffel posseda propi. RTR, L. Livers

Remo Stoffel è bain enconuschent al magazin Bilanz che publitgescha questa rangaziun. Il manader dal project, Stefan Lüscher di dentant ch’i na saja betg cler, con gronda che la facultad da Stoffel saja. Els hajan gia discurrì cun Stoffel ed era gì invista en ses documents, ma or da quels na saja quai betg cler visibel con che Stoffel possedia propi.

Stoffel betg cuntanschibel

Remo Stoffel n’è betg stà cuntanschibel per dar pled en chaussa. El è en l’exteriur. Ses cussegliader Peter Hartmeier ha ditg, ch’el na veglia betg prender posiziun tar ina rangaziun, nua che Remo Stoffel vegnia gnanc avant.