Cumenzà haja il trend d'emprestar taurs avant circa 5 onns, declera Andrea Accola responsabel per la muaglia da vatgas-mamma al Plantahof.
2 mais taur = 580.-
Dasper intgins allevaturs che porschan taurs da prender a tschains èsi oravant tut l' interpresa «Vianco» ch'affittescha ina gronda paletta da taurs.«In pur paja 580 francs per avair in taur durant dus mais.
Sch' il taur ha lura fatg sia lavur vegn el gist tramess tar il proxim bain puril», explitgescha Accola.Uschia sappian ins affittar in taur fin 8 giadas ad onn. Quai saja ina buna fatschenta.
Surtut manaschis pitschens fan diever da
«Rent a bull»
En general pon tut ils manaschis purils emprestar in taur. «Savens èsi dentant plitost uschè numnads manaschis da producziun cun vatgas-mamma ch'emprestan in taur», uschia Accola. Savens sa tractia er plitost da pigns manaschis en ils quals in taur na pudess betg utilisar sia entira capacitad.
Ils allevaturs èn pli pretensius
Ils allevaturs percunter elegian adina fitg specificamain la genetica. «En quest cas èsi pli adattà d'inseminar las vatgas artifizialmain u ch'ins tschertga in taur ch'è adattà per la muaglia.»
Per ils allevaturs saja «rent a bull» dentant displaschaivel, perquai che mintgin ch'emprestia in taur na cumpria betg in, explitgescha Accola. Il martgà da taurs fiss pli grond sch'in na dess betg la pussaivladad d'emprestar taurs.