La svieuta è sa reducida per 23% sin 922 milliuns francs, cumpareglià cun il medem temp da l’onn avant. Sco quai che la Repower scriva, saja la raschun per quest resultat surtut ils pretschs bass per l’energia ed il ferm franc. Il concern grischun fa ina gronda part da sia svieuta en euros. Sa reducì saja surtut il commerci (-11%), il provediemnt e la furniziun però sajan restads quasi tuttina sco l'onn avant (-2%).
Ulteriuras mesiras da spargn èn necessarias
En connex cun il ferm franc sajan ins vid examinar ulteriuras mesiras. Decisiuns concretas vegnian communitgadas pass per pass, communitgescha la Repower. Gia il 2013 aveva l’interpresa instradà mesiras per reducir ils custs. Uschia ha pudì vegnir spargnar mintg’onn passa 20 milliuns francs.
Il matg aveva la Repower gia vendì ses project per realisar in'ovra da gas e svapur a Leverkusen en Germania. Il concern punctuescha però ch'il martgà tudestg restia impurtant. D'ina vart furneschian ins clients gronds cun energia, da l'autra vart saja la Germania sco pli grond martgà da commerci da muntada centrala.
RR novitads 08:00