Forza idraulica betg economica
La situaziun dal martgà actuala saja il mument "fitg pretensiusa" uschia ha ditg Kurt Bobst, il directur dalla Repower, a la conferenza da medias. Ils pretschs per ieli, cotgla e gas sajan sareducids l'onn passa tranter 20% e bunamein 40% e producir electricitad ord forza d'aua custia dapli che quai ch'ella portia. La forza idraulica na saja il mument betg economica. Quai haja era da far cun il curs da l'euro che influenzeschi natiralmein era il resultat da fatschenta.
Be 33 empè 80 euros per MWh
Bobst ha lura era menziunà il fatg ch'avant intgins onns hajan ins calculà cun pretschs da 80 euros per ina megawattura energia e quai tar in curs da bunamain 1,5 fr. per euro. Il mument saja uschia ch'i vegn calculà cun 33 euros per ina megwattura e quai tar in curs da quasi paritad (1fr = 1 euro). Tuttina vul la Repower realisar insacura ses projects gronds Lago Bianco e Chlus. Kurt Bobst spetga en quest connex era las decisiuns dal parlament federal che s'occupa era cun l'energia e la forza idraulica.
Program d'effizienza fa effect
Malgrà las circumstanzas difficilas saja dentant reussì d'augmentar il cashflow l'onn passà sin 82 milliuns francs, il 2013 era quel 69 milliuns francs. Era il program d'optimar l'effizienza ch'il concern ha lantschà avant 4 onns mussa ils effects giavischads. Dapi il 2012 ha Repower pudì spargnar uschia 20 milliuns francs. Il persunal è sa sminuì per 80 plazzas cumpleinas, quai per gronda part ord fluctuaziun natirala. Era ils custs da menaschi hajan ins pudì reducir marcantamein.
RR novitads 12:00
