Sper Vincenz han ils acziunaris e las acziunarias er anc elegì nov en il cussegl d'administraziun: Dr. Urs Rengel, Roland Leuenberger e Peter Eugster. Tuts èn vegnids elegids cleramain. Sa retratgs èn dasper Dr. Eduard Rickli, Dr. Manfred Thumann, Dr. Rudolf Huber, Placi Berther e Gerhard Jochum. Uschia sa cumpona il nov cussegl d'administraziun da:
- Dr. Pierin Vincenz
- Dr. Urs Rengel
- Roland Leuenberger
- Peter Eugster
- Dr. Matin Schmid
- Claudio Lardi
- Rolf W. Mathis
Approvà augment dal chapital d'aczias
La radunanza extraordinaria ha plinavant approvà l’augment dal chapital dad almain 150 milliuns francs. Las ovras electricas dal chantun Turitg (EKZ) e l'investider «UBS Clean Energy Infrastructure» han gia confermà da cumprar aczias novas per questa summa. L'EKZ cumpra aczias per almain 90 milliuns, la UBS-CEIS investischan almain 60 milliuns francs. Cun questa mesira vul il concern grischun tranter auter rinforzar la basa da chapital e reducir ils daivets.
Tgi po cumprar aczias?
Tenor la decisiun da la radunanza generala extraordinaria duai il chapital d'aczias crescher da 3'408'115 francs sin maximal 8'179'476 francs. Ils acziunaris d'enfin ussa han mintgamai in dretg d'acquist per aczia ch'els possedan. Vul dir, sch'inzatgi ha 5 dretgs d'acquist lura po el cumprar 7 novas aczias per il pretsch da 43 francs per aczia. Davent dals 24 da zercladur enfin ils 4 da fanadur pon tut ils acziunaris annunziar lur interess da novas aczias.
RR novitads 16:00